ఎస్‌ఐఆర్‌పై అవగాహనకు బీజేపీ మహా పాదయాత్ర 50 వేల మందితో జనసమీకరణ.. ముఖ్య అతిథిగా సునీల్ బన్సల్.
సూర్య నిర్మల్ జిల్లా ప్రతినిధి.:
నిర్మల్ జిల్లా కేంద్రంలో మంగళవారం బీజేపీ ఆధ్వర్యంలో మహా పాదయాత్ర నిర్వహించనున్నారు. ఓటరు జాబితా ప్రత్యేక సమగ్ర సవరణ (ఎస్‌ఐఆర్‌)పై కాంగ్రెస్, ఇండియా కూటమి చేస్తున్న ఆరోపణలను తిప్పికొట్టడంతో పాటు ప్రజల్లో అవగాహన కల్పించడమే లక్ష్యంగా ఈ కార్యక్రమం చేపట్టనున్నారు. బీజేఎల్పీ నేత, ఎమ్మెల్యే ఏలేటి మహేశ్వర్‌రెడ్డి నేతృత్వంలో జరిగే పాదయాత్రకు బీజేపీ జాతీయ ప్రధాన కార్యదర్శి, తెలంగాణ రాష్ట్ర ఇన్‌చార్జి సునీల్ బన్సల్ ముఖ్య అతిథిగా హాజరుకానున్నారు.
నిర్మల్, ముధోల్, ఖానాపూర్ నియోజకవర్గాల నుంచి సుమారు 50 వేల మందిని సమీకరించాలని పార్టీ లక్ష్యంగా పెట్టుకుంది. ఎమ్మెల్యేలు ఏలేటి మహేశ్వర్‌రెడ్డి, పవార్ రామారావు పటేల్, జిల్లా అధ్యక్షుడు రితేష్ రాథోడ్ ఆధ్వర్యంలో ఏర్పాట్లు చేపట్టారు.
ఢిల్లీ నుంచి హైదరాబాద్‌కు చేరుకోనున్న సునీల్ బన్సల్ అక్కడి నుంచి ప్రత్యేక హెలికాప్టర్‌లో నిర్మల్‌కు రానున్నారు. అనంతరం శాంతినగర్ చౌరస్తా నుంచి శివాజీ చౌక్ మీదుగా వివేక్ చౌక్ వరకు సుమారు రెండు కిలోమీటర్ల మేర పాదయాత్ర సాగనుంది. ఇందుకోసం ప్రత్యేక హెలిప్యాడ్ ఏర్పాటు చేయగా, ఎమ్మెల్యే ఏలేటి మహేశ్వర్‌రెడ్డి భద్రతా ఏర్పాట్లను పరిశీలించారు. నగరంలోని ప్రధాన కూడళ్లను కాషాయ జెండాలు, ఫ్లెక్సీలతో అలంకరించడంతో రాజకీయ సందడి నెలకొంది.
