నాగర్ కర్నూల్ లో మోకాళ్లపై కూర్చొని నిరసన తెలిపిన ఎన్‌హెచ్‌ఎం ఉద్యోగులు
న్యాయమైన డిమాండ్లను పరిష్కరించాలని కోరుతూ జాతీయ ఆరోగ్య మిషన్‌ (ఎన్‌హెచ్‌ఎం) ఉద్యోగులు చేపట్టిన నిరవధిక సమ్మె సోమవారానికి 21వ రోజుకు చేరింది. సమ్మె శిబిరం వద్ద ఉద్యోగులు మోకాళ్లపై కూర్చొని తమ ఆవేదనను వ్యక్తం చేశారు. పెద్దపెట్టున నినాదాలు చేస్తూ ''ఇంకెన్నాళ్లీ ఆత్మఘోష.. మా కష్టాలు, కన్నీళ్లు చాలు మహాప్రభో.. ఇప్పటికైనా ప్రభుత్వం స్పందించి మా ఉద్యోగాలను క్రమబద్ధీకరించాలి'' అంటూ విజ్ఞప్తి చేశారు.గ్రామీణ ప్రాంతాల్లో వైద్య సేవలు అందుబాటులోకి తీసుకెళ్లేందుకు ఎండనకా, వాననకా విధులు నిర్వర్తించారు. గర్భిణులు, బాలింతలు, చిన్నారులు, వృద్ధుల ఆరోగ్య పరిరక్షణలో బాధ్యతాయుతంగా పనిచేశారు. మారుమూల గ్రామాల్లోని పేదలకు సైతం వైద్య సేవలు చేరువ చేసి, అనారోగ్యంతో బాధపడుతున్న వారికి అండగా నిలిచారు. అర్ధరాత్రి వేళల్లోనూ అత్యవసర సేవలకు అందుబాటులో ఉంటూ ఎన్నో కుటుంబాలకు వైద్య భరోసా కల్పించారు. ప్రజారోగ్య పరిరక్షణే బాధ్యతగా భావించి, తమ వ్యక్తిగత అవసరాలను పక్కనపెట్టి విధులు నిర్వర్తించారు. ఇంతటి సేవలందించిన తమకు నేడు ఉద్యోగ భద్రత లేకపోవడం, పిల్లల చదువులు, కుటుంబ పోషణపై ఆందోళన చెందాల్సి రావడం బాధాకరమని వాపోతున్నారు. ప్రజల ప్రాణాలకు భరోసా కల్పించిన తమ కుటుంబాల భవిష్యత్తుకు మాత్రం భరోసా లేకుండా పోయిందని ఆవేదన వ్యక్తం చేస్తున్నారు.. ప్రభుత్వం వెంటనే స్పందించి చర్చలు జరిపి సమస్యలను పరిష్కరించడంతో పాటు ఉద్యోగ భద్రత కల్పించి తమ కుటుంబాల భవిష్యత్తుకు భరోసా ఇవ్వాలని తీవ్రవేదన వ్యక్తం చేస్తున్నారు . కార్యక్రమంలో రాష్ట్ర ఉపాధ్యక్షులు గౌస్ పాషా, జిల్లా గౌరవ అధ్యక్షులు శ్రీనివాసులు, జిల్లా నాయకులు భీముడు, ప్రకాష్, హైమావతి, వనజ, లక్ష్మీనరసమ్మ తదితరులు పాల్గొన్నారు.
-పి.వినయ్ కుమార్, నాగర్‌కర్నూల్‌ క్రైమ్, సూర్య న్యూస్
