అంకత్పల్లిలో ఇందిరమ్మ కుటుంబ జీవిత బీమా పథకం ప్రారంభం
• అర్హులైన ప్రతి కుటుంబానికి భరోసా కల్పించడమే ప్రభుత్వ లక్ష్యం
సూర్య, లక్షెట్టిపేట : మండలంలోని అంకత్పల్లి గ్రామంలో శనివారం ఇందిరమ్మ కుటుంబ జీవిత బీమా పథకాన్ని గ్రామ సర్పంచ్ లింగంపల్లి లత వెంకటేష్ ప్రారంభించారు. ఈ సందర్భంగా పథకానికి సంబంధించిన వివరాలను గ్రామస్తులకు వివరించి, ప్రభుత్వ సంక్షేమ పథకాలను అర్హులైన ప్రతి ఒక్కరూ సద్వినియోగం చేసుకోవాలని సూచించారు. కుటుంబ పెద్దకు అనుకోని ప్రమాదం లేదా మరణం సంభవించినప్పుడు ఆ కుటుంబం ఆర్థిక ఇబ్బందులకు గురికాకుండా భరోసా కల్పించేందుకు ఇలాంటి సంక్షేమ పథకాలు ఎంతగానో ఉపయోగపడతాయని ఈ సందర్భంగా పేర్కొన్నారు. ప్రభుత్వ లక్ష్యాలకు అనుగుణంగా గ్రామంలోని అర్హులైన కుటుంబాలకు పథకం వివరాలను చేరవేసి, అవసరమైన అవగాహన కల్పించాలని సంబంధిత అధికారులు, ప్రజాప్రతినిధులు సూచించారు.
ఈ కార్యక్రమంలో స్పెషల్ ఆఫీసర్, ఎంఆర్ఓ కార్యాలయ డీటీ శ్రావణి, పంచాయతీ కార్యదర్శి కారుకూరి ప్రదీప్ కుమార్, వార్డు సభ్యులు ఎంబడి సాయికుమార్, చట్రజీ శ్రీనివాస్, అవునూరి సత్తయ్య, వీబీజీ రాంజీ ఫీల్డ్ అసిస్టెంట్ అవునూరి సత్తయ్య, విలేజ్ లీగల్ అడ్వైజర్ లింగంపల్లి వెంకటేష్, చెల్లా అశోక్, గ్రామస్థులు తదితరులు పాల్గొన్నారు.