సూర్య నిజామాబాద్ జిల్లా ప్రతినిధి : పోలీస్ అమరవీరుల సంస్మరణ వారోత్సవాల సందర్భంగా తెలంగాణ పోలీస్ శాఖ ఆధ్వర్యంలో ఆదివారం నిజామాబాద్‌లో సైకిల్, బైక్ ర్యాలీ నిర్వహించారు. పోలీస్ కమిషనర్ పి. సాయి చైతన్య, ఐపీఎస్ ఆదేశాల మేరకు అదనపు పోలీస్ కమిషనర్ (అడ్మిన్) ఎన్. శుభం ప్రకాష్ పూలాంగ్ చౌరస్తా వద్ద జెండా ఊపి ర్యాలీని ప్రారంభించారు. అక్కడి నుంచి ప్రగతి హాస్పిటల్, ఎల్‌ఐసీ చౌరస్తా, కోర్టు చౌరస్తా, ఎన్టీఆర్ చౌరస్తా మీదుగా పోలీస్ హెడ్‌క్వార్టర్స్ వరకు ర్యాలీ కొనసాగింది.
ఈ సందర్భంగా ఎన్. శుభం ప్రకాష్ మాట్లాడుతూ దేశ అంతర్గత భద్రత పరిరక్షణ, నేరాల నియంత్రణ, మాదకద్రవ్యాల నిర్మూలన, మహిళల భద్రత కోసం పోలీసులు తమ ప్రాణాలను సైతం త్యాగం చేశారని పేర్కొన్నారు. నక్సలైట్లు, మతతత్వ విభజన శక్తులు, ఇతర సవాళ్లను ధైర్యంగా ఎదుర్కొని ప్రజల రక్షణ కోసం అమరులైన పోలీసుల త్యాగాలు చిరస్మరణీయమన్నారు. నిజామాబాద్ కమిషనరేట్ పరిధిలో ప్రజల కోసం ప్రాణాలర్పించిన అమరవీరుల సేవలు ఎప్పటికీ గుర్తుండిపోతాయని తెలిపారు. దేశం, న్యాయం కోసం నిష్పక్షపాతంగా సేవలందించాలని, పోలీసు యూనిఫాం ప్రతి ఒక్కరికీ గర్వకారణమని అన్నారు.జిల్లాలో అసాంఘిక కార్యకలాపాలకు తావులేకుండా ప్రజలు పోలీసులకు సహకరించాలని, ఎక్కడైనా అనుమానాస్పద ఘటనలు చోటుచేసుకుంటే వెంటనే సమాచారం అందించాలని ఆయన కోరారు. పోలీస్ అమరవీరుల సంస్మరణ వారోత్సవాల్లో భాగంగా అమరవీరుల కుటుంబాలను పరామర్శించినట్లు తెలిపారు. ఈ కార్యక్రమంలో సీఐలు, రిజర్వ్ ఇన్‌స్పెక్టర్లు, ఎస్‌ఐలు, ఆర్‌ఎస్‌ఐలు, ఆర్మ్‌డ్ రిజర్వ్, స్పెషల్ పార్టీ సిబ్బంది, విద్యార్థులు తదితరులు పాల్గొన్నారు.
