ఆయిల్‌పామ్ తోటల పరిశీలన.. రైతులతో కలెక్టర్ ముఖాముఖి
సూర్య వీణవంక : కరీంనగర్ జిల్లా:
కరీంనగర్ జిల్లా కలెక్టర్ చిత్ర మిశ్రా వీణవంక మండలంలోని పలు ఆయిల్‌పామ్ తోటలను సందర్శించి పంట సాగు విధానం, దిగుబడి, పెట్టుబడి ఖర్చులు, రైతులకు కలుగుతున్న ఆదాయం తదితర అంశాలను క్షేత్రస్థాయిలో పరిశీలించారు. ఈ సందర్భంగా ఆయిల్‌పామ్ సాగు చేస్తున్న రైతులతో కలెక్టర్ నేరుగా మాట్లాడి పంట సాగులో ఎదురవుతున్న సమస్యలు, నిర్వహణకు అవుతున్న ఖర్చులు, ఎరువులు, పురుగుమందుల వినియోగం, పంట దిగుబడి వివరాలను అడిగి తెలుసుకున్నారు.రాబోయే ఏలినో పరిస్థితులను దృష్టిలో ఉంచుకొని రైతులకు ముందస్తు వ్యవసాయ సూచనలు అందించాలని కలెక్టర్ సంబంధిత అధికారులకు సూచించారు. అధిక వర్షాలు, నీరు నిల్వ ఉండటం వల్ల పంటలకు కలిగే నష్టాలను తగ్గించేందుకు తీసుకోవాల్సిన జాగ్రత్తలు, పొలాల్లో నీటి పారుదల సౌకర్యాలు, పంటల సంరక్షణ, తెగుళ్ల నివారణ వంటి అంశాలపై రైతులకు అవగాహన కల్పించాలని సూచించారు.గ్రామాల్లో రైతులకు అందుబాటులో ఉంటూ వారి సమస్యలను ఎప్పటికప్పుడు తెలుసుకోవాలని, పంటల సాగు నుంచి దిగుబడుల వరకు అవసరమైన సాంకేతిక సలహాలు అందించాలని అధికారులకు సూచించారు.
జిల్లా కలెక్టర్ క్షేత్రస్థాయిలో పర్యటించి రైతులతో నేరుగా మాట్లాడటం ద్వారా వ్యవసాయ రంగంలో వాస్తవ పరిస్థితులను తెలుసుకోవడంతోపాటు, రైతులకు మెరుగైన సాగు పద్ధతులపై అవగాహన కల్పించేందుకు ప్రాధాన్యత ఇచ్చారు. రైతులు ఎదుర్కొంటున్న సమస్యలను గుర్తించి వాటి పరిష్కారానికి సంబంధిత శాఖల అధికారులు సమన్వయంతో పనిచేయాల్సిన అవసరం ఉందని ఈ పర్యటన ప్రాధాన్యతను చాటిచెప్పింది.
