ఎన్నికల నిర్వహణపై సమీక్ష

బాపట్ల, మేజర న్యూస్ :  జిల్లా కలెక్టర్ మరియు  జిల్లా ఎన్నికల అధికారి, కలెక్టర్ డాక్టర్  వినోద్ కుమార్,వి., ఆదేశాల మేరకు రెండో విడత సాధారణ స్థానిక సంస్థల ఎన్నికల్లో భాగంగా నవంబర్ 5న జిల్లాలో జరగనున్న జడ్పీటీసీ, ఎంపీటీసీ ఎన్నికల నిర్వహణకు సంబంధించి పోలింగ్ విధులు నిర్వహించే ప్రిసైడింగ్ అధికారులు (పీఓలు), సహాయ ప్రిసైడింగ్ అధికారులు (ఏపీఓ)లకు గురువారం పట్టణ పరిధిలోని ఓ ప్రైవేటు పాఠశాలలో రెండో విడత శిక్షణా కార్యక్రమం నిర్వహించారు.

ఈ శిక్షణలో పోలింగ్ రోజు చేపట్టాల్సిన విధులు, పోలింగ్ కేంద్రంలో అనుసరించాల్సిన ఎన్నికల నిబంధనలు, ఓటింగ్ ప్రక్రియ నిర్వహణ, పోలింగ్ సామగ్రి వినియోగం, ఎన్నికల సంబంధిత రికార్డుల నిర్వహణ, పోలింగ్ ముగిసిన అనంతరం బ్యాలెట్ బాక్సులు, ఎన్నికల సామగ్రిని సంబంధిత అధికారులకు అప్పగించే విధానాలపై అధికారులు శిక్షణ అందించారు.
ఎన్నికల విధులపై అధికారులు పూర్తి అవగాహన కలిగి ఉండాలని, ఎన్నికల కమిషన్ మార్గదర్శకాలను తప్పనిసరిగా పాటిస్తూ, పోలింగ్ ప్రక్రియను ప్రశాంతంగా, పారదర్శకంగా, నిష్పక్షపాతంగా నిర్వహించాలని శిక్షణలో సూచించారు.మాస్టర్ ట్రైనర్లు జి. ఉదయ్ శంకర్, సీహెచ్. బాలకోటేశ్వరరావు బ్యాలెట్ బాక్సుల నిర్వహణ, వివిధ కవర్లు, ఎన్నికల ఫారాలు పూర్తి చేసే విధానాలను క్షుణ్ణంగా వివరించారు.

ఈ కార్యక్రమంలో బి.సి.సంక్షేమ శాఖ మరియు బాపట్ల  మండల ఆర్ ఓ శివలీల,  ఎంఇఓ ఎస్ నిరంజన్,పి ఓ లు,ఏ పి ఓ లు తదితరులు పాల్గొన్నారు.