ఆధునిక వ్యవసాయంతో అధిక దిగుబడులు సాధించాలి: రైతులకు నిపుణుల సూచన

బొంరాస్‌పేట్ ,మేజర్ న్యూస్: వ్యవసాయంలో ఆధునిక పద్ధతులను అవలంబిస్తూ అధిక దిగుబడులు సాధించడంతో పాటు సాగు ఖర్చులను తగ్గించుకోవాలని వ్యవసాయ నిపుణులు రైతులకు సూచించారు. వ్యవసాయ శాఖ బొంరాస్‌పేట్ ఆధ్వర్యంలో గురువారం మండల కేంద్రంలోని రైతు వేదికలో ఏటీఎంఏ (ATMA) ఆర్‌పీఎల్ (RPL) శిక్షణ కార్యక్రమాన్ని నిర్వహించారు. ఈ సందర్భంగా రైతులకు ప్రత్యామ్నాయ వరి రకాలు, నూనె గింజల సాగు, నానో ఎరువుల వినియోగం, ప్రకృతి వ్యవసాయ పద్ధతులపై అవగాహన కల్పించారు.ఈ శిక్షణ కార్యక్రమంలో తెలంగాణ రైతు విజ్ఞాన కేంద్రం (TRVK) శాస్త్రవేత్త డాక్టర్ ఉమారాజశేఖర్ పాల్గొని ఆధునిక వ్యవసాయ విధానాల గురించి వివరించారు. ప్రస్తుత వ్యవసాయ పరిస్థితులకు అనుగుణంగా పంటలను ఎంపిక చేసుకోవడం, ప్రత్యామ్నాయ వరి రకాలను ప్రోత్సహించడం, నూనె గింజల పంటల సాగును విస్తరించడం ద్వారా రైతులకు ప్రయోజనం చేకూరుతుందని తెలిపారు. అలాగే నానో ఎరువుల వినియోగం, వాటి ప్రయోజనాలు, ప్రకృతి వ్యవసాయ పద్ధతులపై శాస్త్రీయ అవగాహన కల్పించారు.వరి సాగులో ప్రత్యామ్నాయ రకాలను ఎంచుకోవడంతో పాటు పంటల వైవిధ్యానికి ప్రాధాన్యత ఇవ్వాలని నిపుణులు సూచించారు. వ్యవసాయంలో అందుబాటులో ఉన్న ఆధునిక సాంకేతిక పరిజ్ఞానాన్ని వినియోగించుకోవడం ద్వారా సాగును మరింత లాభదాయకంగా మార్చుకోవచ్చని వివరించారు. రైతులు వ్యవసాయ శాఖ అధికారులు, శాస్త్రవేత్తల సూచనలు పాటిస్తూ నూతన సాగు పద్ధతులను అనుసరించాలని తెలిపారు.ఈ శిక్షణ కార్యక్రమం ద్వారా రైతులకు ఆధునిక వ్యవసాయ విధానాలు, ప్రత్యామ్నాయ పంటల సాగు, ఎరువుల వినియోగంపై అవగాహన కలిగింది.ఈ కార్యక్రమంలో మండల వ్యవసాయ అధికారి సి. కరుణాకర్ రెడ్డి, ఐసీఎం శాస్త్రవేత్త డాక్టర్ కవిరాజు, వ్యవసాయ విస్తరణ అధికారులు ఎం. స్వాతి, జి. హేమ, జి. పవన్, జి. సాయి తేజ, కె. భావనతో పాటు బొంరాస్‌పేట్ గ్రామానికి చెందిన రైతులు పాల్గొన్నారు.

రిపోర్టర్: శ్రీశైలం, బొంరాస్ పేట్, వికారాబాద్ జిల్లా.