సూర్య కథనానికి స్పందన.. అగర్‌గూడకు బస్సు సర్వీసు ప్రారంభం
సూర్య, పెంచికల్‌పేట్:అగర్‌గూడ గ్రామ విద్యార్థుల బస్సు కష్టాలపై ‘సూర్య’ దినపత్రికలో ప్రచురితమైన కథనానికి స్పందన లభించింది. ఎమ్మెల్యే పాల్వాయి హరీష్ బాబు చొరవతో గ్రామానికి బస్సు సర్వీసు ప్రారంభమైంది. పాఠశాలలకు వెళ్లేందుకు ప్రతిరోజూ సుమారు ఐదు కిలోమీటర్లు నడవాల్సి వస్తోందని, ఆటో చార్జీలు పెరగడంతో రవాణా ఖర్చులు భరించలేక ఇబ్బందులు పడుతున్నామని విద్యార్థులు ఎదుర్కొంటున్న సమస్యలను ‘సూర్య’ వెలుగులోకి తీసుకొచ్చింది. దీంతో గ్రామానికి బస్సు సౌకర్యం అందుబాటులోకి రావడంపై విద్యార్థులు, తల్లిదండ్రులు, గ్రామస్తులు హర్షం వ్యక్తం చేశారు.గ్రామ సర్పంచ్ అల్లూరి రాజేశ్వరి రాజు, పార్టీ నాయకులు, గ్రామ పెద్దలు, గ్రామస్తుల సమక్షంలో బస్సు సర్వీసును ప్రారంభించారు. ఈ సౌకర్యంతో విద్యార్థులు పాఠశాలలకు చేరుకోవడంతోపాటు వివిధ అవసరాల నిమిత్తం మండల కేంద్రానికి వెళ్లే గ్రామ ప్రజలకు రవాణా కష్టాలు తగ్గనున్నాయి. బస్సు సర్వీసు ఏర్పాటుకు చొరవ చూపిన ఎమ్మెల్యే పాల్వాయి హరీష్ బాబుకు గ్రామస్తులు కృతజ్ఞతలు తెలిపారు. విద్యార్థుల సమస్యను వెలుగులోకి తీసుకొచ్చిన ‘సూర్య’ దినపత్రిక కథనంపై కూడా ప్రజలు హర్షం వ్యక్తం చేశారు.
