SIR ప్రక్రియ పారదర్శకంగా నిర్వహించాలి
- సీఈసీ జ్ఞానేశ్కుమార్ రాజీనామా చేయాలి: సీపీఐ
- అక్టోబర్ 1న అన్ని జిల్లాల కలెక్టరేట్ల ముట్టడికి పిలుపు
ఎన్నికల సంఘం చేపట్టిన ఎస్ఐఆర్ (స్పెషల్ ఇంటెన్సివ్ రివిజన్) ప్రక్రియలో పారదర్శకత లోపించిందని ఆరోపిస్తూ భారత కమ్యూనిస్టు పార్టీ (సీపీఐ) ఆధ్వర్యంలో శంషాబాద్లో నిరసన కార్యక్రమం నిర్వహించారు. ఎన్నికల సంఘం వ్యవహరిస్తున్న తీరును మార్చుకోవాలని, ఓటర్ల హక్కులను పరిరక్షించాలని నాయకులు డిమాండ్ చేశారు.
ఈ సందర్భంగా సీపీఐ జిల్లా అధ్యక్షుడు పాలమాకుల జంగయ్య మాట్లాడుతూ.. ఎన్నికల ప్రక్రియలో అవకతవకలకు ప్రధాన ఎన్నికల కమిషనర్ జ్ఞానేశ్కుమార్ బాధ్యత వహించాలని ఆరోపించారు. ఎస్ఐఆర్ ప్రక్రియ పారదర్శకంగా లేదని, దీనివల్ల పెద్ద సంఖ్యలో అర్హులైన ఓటర్లు తమ ఓటు హక్కును కోల్పోయే ప్రమాదం ఉందని ఆయన ఆందోళన వ్యక్తం చేశారు. ఎన్నికల ప్రక్రియపై ప్రజల్లో విశ్వాసం నిలబెట్టేందుకు ఎన్నికల సంఘం పారదర్శకంగా వ్యవహరించాలని డిమాండ్ చేశారు.
కేంద్రంలో బీజేపీ అధికారంలోకి వచ్చిన అనంతరం కార్పొరేట్ శక్తులకు అనుకూలంగా ప్రజా వ్యతిరేక విధానాలను అమలు చేస్తోందని జంగయ్య విమర్శించారు. కుల, మత రాజకీయాల ద్వారా సమాజంలో విభేదాలను పెంచే ప్రయత్నాలు జరుగుతున్నాయని ఆయన ఆరోపించారు. ఎన్నికల ప్రక్రియలో జరుగుతున్న అక్రమాలకు బాధ్యత వహిస్తూ ప్రధాన ఎన్నికల కమిషనర్ జ్ఞానేశ్కుమార్ రాజీనామా చేయాలని డిమాండ్ చేశారు.
జ్ఞానేశ్కుమార్ రాజీనామా చేయకపోతే అక్టోబర్ 1న సీపీఐ ఆధ్వర్యంలో తెలంగాణ రాష్ట్రంలోని అన్ని జిల్లాల కలెక్టరేట్ల వద్ద ధర్నా, ముట్టడి కార్యక్రమాలు నిర్వహిస్తామని జంగయ్య ప్రకటించారు. ఈ కార్యక్రమాలకు సీపీఐ నాయకులు, కార్యకర్తలు పెద్ద సంఖ్యలో తరలివచ్చి విజయవంతం చేయాలని ఆయన పిలుపునిచ్చారు.
కార్యక్రమంలో సీపీఐ నాయకులు, కార్యకర్తలు పాల్గొని ఎన్నికల ప్రక్రియలో పారదర్శకత, ఓటర్ల హక్కుల పరిరక్షణ కోసం నినాదాలు చేశారు.
- పోతుల నరసింహ : మేజర్ న్యూస్, శంషాబాద్.
