రైతుల వడ్ల కొనుగోళ్లకు అడ్డంకులు సృష్టించొద్దు

సూర్య,మాక్లూర్ :రైతులు తమ పంటను అధిక ధరకు కొనుగోలు చేసే వ్యాపారులకు విక్రయించుకునే స్వేచ్ఛ కల్పించాలని మాక్లూర్ మండల బీఆర్‌ఎస్ అధ్యక్షుడు గోపు రంజిత్ కుమార్ డిమాండ్ చేశారు.బోధన్, నవీపేట్, ఆర్మూర్ నియోజకవర్గ పరిధిలోని నందిపేట్, మాక్లూర్ తదితర ప్రాంతాల్లో మహారాష్ట్రకు చెందిన వ్యాపారులు రైతుల నుంచి క్వింటాల్ వడ్లను రూ.3800 వరకు కొనుగోలు చేస్తున్నారని తెలిపారు. అయితే ఇతర రాష్ట్రాలైన మహారాష్ట్ర, కర్ణాటక, ఆంధ్రప్రదేశ్‌కు చెందిన వ్యాపారులు రైతుల నుంచి వడ్లు కొనుగోలు చేయకుండా కొందరు రైస్ మిల్లర్లు అడ్డంకులు సృష్టిస్తున్నారని ఆరోపించారు.
రైతులకు ఎక్కువ ధర లభించే అవకాశాలను అడ్డుకోవడం సరికాదని, ఇలాంటి చర్యలకు పాల్పడుతున్న రైస్ మిల్లర్లపై అధికారులు తగిన చర్యలు తీసుకోవాలని కోరారు. రైతులు తమకు నచ్చిన వ్యాపారికి, ఎక్కువ ధర చెల్లించే వారికి పంటను విక్రయించుకునేలా ప్రభుత్వం చర్యలు తీసుకోవాలని అన్నారు.బోధన్ ఎమ్మెల్యే, ప్రభుత్వ సలహాదారు సుదర్శన్ రెడ్డి వెంటనే చొరవ తీసుకుని రైతులకు న్యాయం చేయాలని గోపు రంజిత్ కుమార్ కోరారు. రైతుల కొనుగోళ్లకు ఎవరైనా అడ్డంకులు సృష్టిస్తే, రైతులంతా ఏకమై ఆయా రైస్ మిల్లుల వద్దకు వచ్చి నిరసన చేపట్టాల్సి వస్తుందని హెచ్చరించారు.