రాయచూరు మార్కెట్ యార్డును సందర్శించిన వికారాబాద్ మార్కెట్ కమిటీ

రైతులకు మెరుగైన మార్కెట్ సదుపాయాలపై అధ్యయనం
వికారాబాద్ జిల్లా ప్రతినిధి, మేజర్ న్యూస్ (సెప్టెంబర్ 27): తెలంగాణ శాసనసభ స్పీకర్, వికారాబాద్ ఎమ్మెల్యే శ్రీ గడ్డం ప్రసాద్ కుమార్ అనుమతితో నిర్వహిస్తున్న వికారాబాద్ వ్యవసాయ మార్కెట్ కమిటీ స్టడీ టూర్‌లో భాగంగా కర్ణాటక రాష్ట్రంలోని రాయచూరు జిల్లా వ్యవసాయ మార్కెట్ యార్డును వికారాబాద్ మార్కెట్ కమిటీ చైర్మన్ శ్రీనివాస్ ముదిరాజ్, పాలకవర్గ సభ్యులు సందర్శించారు.
ఈ సందర్భంగా రాయచూరు మార్కెట్ యార్డులో కొనసాగుతున్న వ్యవసాయ మార్కెట్ కార్యకలాపాలు, రైతులకు అందుతున్న సౌకర్యాలు, పంటల కొనుగోలు–అమ్మకాలు, మార్కెట్ నిర్వహణ విధానాలను కమిటీ సభ్యులు పరిశీలించారు. రైతులకు మెరుగైన మార్కెట్ సదుపాయాలు కల్పించేందుకు అక్కడ చేపడుతున్న చర్యలను సంబంధిత అధికారులను అడిగి తెలుసుకున్నారు.
రైతులకు గిట్టుబాటు ధరలు లభించేలా మార్కెట్ కమిటీలు సమర్థవంతంగా పనిచేయాల్సిన అవసరం ఉందని చైర్మన్ శ్రీనివాస్ ముదిరాజ్ పేర్కొన్నారు. రాయచూరు వ్యవసాయ మార్కెట్‌లో అమలు చేస్తున్న విధానాలను పరిశీలించడం ద్వారా వికారాబాద్ మార్కెట్ కమిటీ పరిధిలో రైతులకు మరింత మెరుగైన సేవలు అందించేందుకు ఉపయోగపడే అంశాలను తెలుసుకున్నామని తెలిపారు.
ఈ కార్యక్రమంలో వికారాబాద్ వ్యవసాయ మార్కెట్ కమిటీ వైస్ చైర్మన్ మల్లేశం, డైరెక్టర్లు విజేందర్ రెడ్డి, ప్రభాకర్, పాపిరెడ్డి, నాగిరెడ్డి, రాజునాయక్, రమేష్ నాయక్, భీమయ్య, రంగారెడ్డి, అధికారులు, సిబ్బంది తదితరులు పాల్గొన్నారు.