పండగ వేళ వినియోగదారులకు షాక్.. ఏసీలు, టీవీలు, గృహోపకరణాల ధరలు పెంపు

సూర్య బిజినెస్ డెస్క్: దసరా, దీపావళి తదితర పండుగల సీజన్ సమీపిస్తున్న తరుణంలో ఎలక్ట్రానిక్స్ వినియోగదారులకు గట్టి ఎదురుదెబ్బ తగలనుంది. అంతర్జాతీయ మార్కెట్లో ముడిసరుకుల ధరలు భగ్గుమంటుండటంతో పాటు విదేశీ మారకద్రవ్య విలువలో హెచ్చుతగ్గులు, రవాణా ఛార్జీలు పెరగడం వంటి కారణాల వల్ల ఏసీలు, రిఫ్రిజిరేటర్లు, వాషింగ్ మెషీన్లు మరియు ఎల్ఈడీ టీవీల ధరలు అక్టోబర్ 1 నుంచి ఐదు నుంచి ఎనిమిది శాతం వరకు పెరగనున్నట్లు ప్రముఖ గృహోపకరణాల తయారీ సంస్థలు వెల్లడించాయి.  

 ప్రధానంగా రాగి, ఉక్కు, అల్యూమినియం వంటి కీలక లోహాల ధరలు విపరీతంగా పెరగడం తయారీదారులపై తీవ్ర భారాన్ని మోపుతోందని పరిశ్రమ వర్గాలు పేర్కొంటున్నాయి. గత సంవత్సరంతో పోలిస్తే ముడిసరుకుల వ్యయం గణనీయంగా ఎగబాకడంతో పాటు పశ్చిమాసియా సంక్షోభం కారణంగా అంతర్జాతీయంగా సప్లై చెయిన్ వ్యవస్థ దెబ్బతినడమే ఈ ధరల పెంపునకు ప్రధాన కారణంగా నిలిచింది. ఈ ఏడాదిలో వినియోగ ఎలక్ట్రానిక్స్ రంగం ధరలను సవరించడం ఇది మూడోసారి కావడం గమనార్హం. 

ఇది కూడా చదవండి : ఆర్మానీ వాటా విక్రయం బహుళ ఇన్వెస్టర్ల ప్రమేయం ఉండే అవకాశం

  బ్లూ స్టార్, గోద్రెజ్ అప్లయెన్సెస్, హయర్, డైకిన్ వంటి అగ్రశ్రేణి కంపెనీలు ఇప్పటికే తమ ఉత్పత్తులపై వివిధ శ్రేణులలో నాలుగు నుంచి పది శాతం వరకు ధరలను పెంచేందుకు సన్నాహాలు చేశాయి. అయితే పండుగ సీజన్ ప్రారంభం కావడంతో పాత నిల్వలు అయిపోయే వరకు ప్రస్తుత ధరలకే కొనుగోలు చేసే అవకాశం ఉంటుందని, ఆ తర్వాతే కొత్త ధరలు పూర్తిగా అమల్లోకి వస్తాయని కంపెనీల ప్రతినిధులు స్పష్టం చేశారు.