సబ్సిడీ రుణాల పేరుతో మోసం చేశారంటూ ఎస్పీకి ఫిర్యాదు

సబ్సిడీ రుణాల పేరుతో మోసం చేశారంటూ ఎస్పీకి ఫిర్యాదు

లోన్లు ఇప్పిస్తామని నమ్మించి లక్షల రూపాయలు వసూలు చేశారంటూ బాధితుల ఆరోపణలు

రెండేళ్లుగా తిరుగుతున్నా డబ్బులు తిరిగి ఇవ్వలేదని ఫిర్యాదు

మదనపల్లె, అన్నమయ్య జిల్లా:

సబ్సిడీ రుణాలు ఇప్పిస్తామని నమ్మించి తమ వద్ద నుంచి డబ్బులు వసూలు చేసి మోసం చేశారంటూ తిరుపతికి చెందిన పలువురు మహిళలు అన్నమయ్య జిల్లా ఎస్పీ ధీరజ్ కునుబిల్లికి ఫిర్యాదు చేశారు. సోమవారం నిర్వహించిన ప్రజా ఫిర్యాదుల పరిష్కార వ్యవస్థ (పీజీఆర్‌ఎస్‌)లో బాధితులు తమ ఫిర్యాదును సమర్పించారు.

బాధితుల ఆరోపణల ప్రకారం.. అన్నమయ్య జిల్లా కురబలకోట మండలం అంగళ్లుకు చెందిన ఆవుల కవిత సబ్సిడీ రుణాలు ఇప్పిస్తానని నమ్మించి తిరుపతిలోని శ్రీపురం కాలనీ, కొర్లగుంట ప్రాంతాలకు చెందిన మహిళల నుంచి ఒక్కొక్కరి వద్ద రూ.15 వేల నుంచి రూ.30 వేల వరకు వసూలు చేసినట్లు తెలిపారు. ఈ విధంగా సుమారు రూ.5 లక్షల వరకు వసూలు చేసినట్లు బాధితులు ఆరోపించారు.

రుణాలు ఇప్పిస్తామని చెప్పి రెండేళ్లుగా తిప్పుకుంటున్నారని, తాము ఫోన్‌పే ద్వారా చెల్లించిన డబ్బును కూడా తిరిగి ఇవ్వలేదని బాధితులు నాగరత్న, వరలక్ష్మి తదితరులు ఫిర్యాదులో పేర్కొన్నారు. పలుమార్లు డబ్బులు తిరిగి ఇవ్వాలని కోరినా స్పందన లేకపోవడంతో చివరకు జిల్లా ఎస్పీని ఆశ్రయించినట్లు తెలిపారు.

తమ నుంచి తీసుకున్న డబ్బులను తిరిగి ఇప్పించి, ఈ వ్యవహారంపై సమగ్రంగా విచారణ చేపట్టి న్యాయం చేయాలని బాధిత మహిళలు ఎస్పీని కోరారు. ఫిర్యాదును స్వీకరించిన అధికారులు విషయాన్ని పరిశీలించి తగిన చర్యలు తీసుకుంటామని హామీ ఇచ్చినట్లు బాధితులు తెలిపారు.