శాస్త్రీయ విద్యా విధానం కోసం పోరాడాలి విద్యార్థి సంఘాలకు ఎన్నికలు నిర్వహించాలి విద్యార్థులు భగత్ సింగ్ వారసులుగా ఎదగాలి సిపిఐ రాష్ట్ర కార్యదర్శి, ఎమ్మెల్యే కూనంనేని సాంబశివరావు వేలాది మందితో విద్యార్థి మహా ప్రదర్శన

తెలంగాణ బ్యూరో, ప్రతినిధి: శాస్త్రీయ విద్యా విధానం కోసం విద్యార్థులు పోరాడాలని సిపిఐ రాష్ట్ర కార్యదర్శి, కొత్తగూడెం ఎమ్మెల్యే కూనంనేని సాంబశివరావు పిలుపునిచ్చారు. అఖిల భారత విద్యార్థి సమాఖ్య (ఏఐఎస్ఎఫ్) 90వ వార్షికోత్సవాల సందర్భంగా సోమవారం హనుమకొండలో వేలాది మంది విద్యార్థులతో మహా ప్రదర్శన నిర్వహించారు. స్థానిక పబ్లిక్ గార్డెన్ నుండి ప్రారంభమైన విద్యార్థి ప్రదర్శన కేయూ క్రాస్ రోడ్ మీదుగా కాకతీయ యూనివర్సిటీ ఆడిటోరియం వరకు కొనసాగింది. అనంతరం యూనివర్సిటీ ఆడిటోరియంలో జరిగిన ఏఐఎస్ఎఫ్ 90వ వార్షికోత్సవం బహిరంగ సభలో ఎమ్మెల్యే కూనంనేని సాంబశివరావు ముఖ్య అతిథిగా పాల్గొన్నారు. ఈ సందర్భంగా ఆయన మాట్లాడుతూ దేశంలో 90 ఏండ్ల చరిత్ర ఏ విద్యార్థి సంఘానికి లేదని, స్వాతంత్ర్య ఉద్యమంలో పురుడు పోసుకుని దేశ స్వాతంత్ర్యం, దేశ భద్రత, శాస్త్రీయ విద్య లక్ష్యాలుగా చదువుతూ పోరాడు.. చదువుకై పోరాడు అన్న నినాదం ఏఐఎస్ఎఫ్ ఆవిర్భావం జరిగిందని తెలిపారు.కమ్యూనిస్టు భావజాలాన్ని పునికిపుచ్చుకున్న కామ్రేడ్ షహీద్ భగత్ సింగ్ వారసత్వంతో ఏఐఎస్ఎఫ్ పుట్టిందని, దేశంలో ప్రథమ విద్యార్థి సంఘం అయిన ఏఐఎస్ఎఫ్ లో నెహ్రూ, అటల్ జీ లాంటి వారు పని చేశారని తెలిపారు. నాటి నుండి నేటి వరకు ఏఐఎస్ఎఫ్ శాస్త్రీయ విద్యా విధానం కోసం పోరాడుతున్నదని, ఏఐఎస్ఎఫ్ లో పని చేసిన వారు ఎంతో మంది ఉన్నత స్థాయికి ఎదిగారని చెప్పారు. నేడు విద్యా రంగం పలు సమస్యలను ఎదుర్కొంటున్నదని, విద్యార్థి లోకాన్ని నిర్వీర్యం చేసేలా పాలకుల విధానాలు కొనసాగుతున్నాయని అన్నారు. కేంద్రంలోని బిజెపి ప్రభుత్వం విద్యా రంగంలో కాషాయీకరణ చొప్పిస్తూ విద్యార్థులలో మతోన్మాదాన్ని పెంచి పోషిస్తున్నదని విమర్శించారు. విద్యా కాషాయీకరణకు వ్యతిరేకంగా విద్యార్థి లోకం ముందుకు సాగాలని పిలుపునిచ్చారు. అలాగే విద్యార్థుల నుండి రేపటి నవతరం నాయకులు తయారు కావాలని, అందుకు విద్యా సంస్థలలో విద్యార్థి సంఘాలకు ఎన్నికలు నిర్వహించాలన్నారు. వరంగల్ లోని ఆర్ఈసి నుండి ఒకప్పుడు ఎంతో మంది నాయకులు తయారై సమాజానికి సేవలందించారని గుర్తు చేశారు. విద్యార్థి సంఘాలకు ఎన్నికలు నిర్వహిస్తే ప్రతి కళాశాలలో ఏఐఎస్ఎఫ్ జెండా ఎగురాలని పిలుపునిచ్చారు. విద్యార్థులు చదువుతో శారీరకంగా, మానసికంగా దృఢంగా తయారు కావాలని, భగత్ సింగ్ వారసులుగా ఎదగాలని సూచించారు. ఈ సందర్భంగా మహాకవి శ్రీశ్రీ, వివేకానందుడి బోధనలను ఆయన ఉటంకిస్తూ సమాజాన్ని బాగు చేసే ముందు యుగం దూతలుగా విద్యార్థులు ఎదగాలని అన్నారు. భారత రాజకీయాల్లో పాలకుల విధానాలను మార్చే శక్తి విద్యార్థులదేనని ఏఐఎస్ఎఫ్ జాతీయ ప్రధాన కార్యదర్శి దినేష్ సిరంగి రాజన్ అన్నారు. ఏఐఎస్ఎఫ్ 90వ వార్షికోత్సవం బహిరంగ సభలో ఆయన ప్రసంగిస్తూ భగత్ సింగ్ వారసులైన విద్యార్థుల శక్తి జెన్ జీ ఉద్యమంగా మారిందని తెలిపారు. కేంద్రంలో మోడీ ప్రభుత్వం ఫాసిస్ట్ పాలన కొనసాగిస్తూ విద్యార్థుల హక్కులను కాలరాస్తున్నదని విమర్శించారు. చివరకు ఎన్నికల కమిషన్ ను ప్రయోగించి విద్యార్థి, యువ జనుల ఓటు హక్కును దోచుకుంటున్నారని ఆరోపించారు. ఆరోపణలు ఎదుర్కొంటున్న ఎన్నికల కమిషన్ ప్రధాన అధికారి జ్ఞానేష్ కుమార్ ను ఆ పదవి నుండి వెంటనే తొలగించాలని డిమాండ్ చేశారు. దేశంలో ప్రజాస్వామ్య పరిరక్షణకు పోరాడాల్సిన బాధ్యత విద్యార్థులపై ఉందన్నారు. ఇందుకోసం రియల్ హీరో లైన భగత్ సింగ్, బీఆర్ అంబేద్కర్, బిర్సాముండా లాంటి వారిని ఆదర్శంగా తీసుకుని ముందుకు సాగాలని పిలుపునిచ్చారు.
ఏఐఎస్ఎఫ్ జిల్లా సమితి ఆధ్వర్యంలో జరిగిన ఈ కార్యక్రమంలో ఏఐఎస్ఎఫ్ జాతీయ మాజీ అధ్యక్షులు తక్కళ్లపల్లి శ్రీనివాసరావు, సిపిఐ జిల్లా కార్యదర్శి కర్రె బిక్షపతి, ప్రజా నాట్యమండలి రాష్ట్ర ప్రధాన కార్యదర్శి పల్లె నర్సింహా, ఏఐఎస్ఎఫ్ రాష్ట్ర అధ్యక్ష, ప్రధాన కార్యదర్శులు కసిరెడ్డి మణికంట రెడ్డి, పుట్టా లక్ష్మణ్,రాష్ట్ర యూనివర్సిటీల ఇంచార్జ్ రెహమాన్, హనుమకొండ జిల్లా అధ్యక్ష,కార్యదర్శులు ఉట్కూరి ప్రణీత్ గౌడ్, బాషబోయిన సంతోష్, వరంగల్ జిల్లా అధ్యక్ష,కార్యదర్శులు దిడ్డి పార్థసారథి, ల్యాదెళ్ల శరత్ తదితరులు పాల్గొన్నారు.