కల్వర్టు పనులతో ఆర్టీసీ బస్సుల దారి మార్పు!

ప్రొద్దుటూరు అర్బన్ మేజర్ న్యూస్:

ప్రొద్దుటూరు పట్టణంలో ఆర్టీసీ బస్సుల రూట్ మార్పులను దృష్టిలో ఉంచుకుని మరిన్ని బస్సుల రాకపోకలకు చర్యలు తీసుకుంటున్నట్లు డిపో మేనేజర్ గంగాధర్ తెలిపారు. సబ్‌ రిజిస్ట్రార్ ఆఫీస్ వద్ద కల్వర్టు మరమ్మతులు పనులు జరుగుతున్న నేపథ్యంలో ప్రయాణికుల రాకపోకలకు ఇబ్బందులు లేకుండా ప్రత్యామ్నాయ ఏర్పాట్లు చేస్తున్నట్లు పేర్కొన్నారు. దీంతో వైఎస్సార్‌ సర్కిల్‌ వైపు నుంచి వచ్చే బస్సులు 2 టౌన్ బైపాస్, ఆంధ్రకేసరి రోడ్డు మీదుగా కొత్త బస్టాండ్‌కు రాకపోకలు సాగించేలా చర్యలు చేపట్టినట్లు తెలిపారు. ఉదయం 8 నుంచి మధ్యాహ్నం 12 గంటల వరకు, సాయంత్రం 4 నుంచి రాత్రి 8 గంటల వరకు ఆర్టీసీ బస్సులు బైపాస్ మార్గంలో నడిచేలా ఏర్పాట్లు చేసినట్లు వెల్లడించారు. అదేవిధంగా మధ్యాహ్నం 12 నుంచి 4 గంటల వరకు ప్రైవేట్ బస్సులు ఈ మార్గంలో రాకపోకలు సాగించనున్నట్లు డిపో మేనేజర్ తెలిపారు. ప్రయాణికులకు అసౌకర్యం కలగకుండా ట్రాఫిక్ పరిస్థితులను బట్టి అవసరమైన చర్యలు తీసుకుంటామని ఆయన పేర్కొన్నారు.