సూర్య క్రైమ్ డెస్క్: తమిళనాడులోని కోయంబత్తూరులో పోలీసుల తనిఖీలను తప్పించుకునేందుకు యత్నించిన గుట్కా స్మగ్లర్ల దుశ్చర్య కలకలం రేపింది. నిషేధిత గుట్కాను తరలిస్తున్న కారును ఆపేందుకు యత్నించిన హెడ్ కానిస్టేబుల్‌పైకి ఎస్‌యూవీని పోనిచ్చిన నిందితులు, ఆయనను అలాగే ఈడ్చుకుంటూ సుమారు 40 కిలోమీటర్ల దూరం పరారయ్యేందుకు సాహసించారు. ఈ భయానక ఘటనకు సంబంధించిన దృశ్యాలు ప్రస్తుతం సామాజిక మాధ్యమాలలో వైరల్‌గా మారాయి.  

 కోవిల్‌పాళయం పోలీస్ స్టేషన్ పరిధిలో పోలీసులు వాహన తనిఖీలు నిర్వహిస్తున్న సమయంలో ఈ ఘటన చోటుచేసుకుంది. సుమారు 250 కిలోలకు పైగా నిషేధిత గుట్కా ఉత్పత్తులను లోడ్ చేసుకుని వెళ్తున్న ఒక ఎస్‌యూవీని ఆపడానికి పోలీసులు ప్రయత్నించగా, డ్రైవర్ వాహనాన్ని ఆపకుండా వేగంగా దూసుకెళ్లాడు. ఆ సమయంలో అప్రమత్తమైన హెడ్ కానిస్టేబుల్ వేల్మురుగన్ ప్రాణాలను సైతం లెక్కచేయకుండా కారు రూఫ్ రైల్స్‌ను గట్టిగా పట్టుకున్నారు. అయినప్పటికీ నిందితులు వాహనాన్ని ఆపకుండా అత్యంత వేగంగా హైవేపైకి దూసుకెళ్లారు.   వేగంగా వెళ్తున్న ఎస్‌యూవీ పైకప్పుపై కానిస్టేబుల్ ప్రాణాలకు తెగించి వేలాడుతున్న ఈ ప్రమాదకర దృశ్యాలను అటుగా వెళ్తున్న నేషనల్ హైవేస్ అథారిటీ ఆఫ్ ఇండియా (ఎన్‌హెచ్‌ఏఐ) అంబులెన్స్ సిబ్బంది గమనించి వీడియో తీశారు.

ఇది కూడా చదవండి : లంచం తీసుకుంటూ ఏసీబీకి చిక్కిన మెట్పల్లి సీడీపీవో

 సమాచారం అందుకున్న తోటి పోలీసులు మరియు స్థానికుల సహకారంతో ఎట్టకేలకు నిందితులను అదుపులోకి తీసుకున్నారు. రాజస్థాన్‌కు చెందిన వ్యక్తులుగా గుర్తించిన నిందితుల నుంచి భారీగా గుట్కాతో పాటు వాహనాన్ని స్వాధీనం చేసుకుని కేసు నమోదు చేసి దర్యాప్తు జరుపుతున్నట్లు పోలీసులు వెల్లడించారు.