ప్రభుత్వ డిగ్రీ కళాశాలలో ఘనంగా బతుకమ్మ సంబరాలు

సూర్య మంచిర్యాల టౌన్ : తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకుని మంచిర్యాల ప్రభుత్వ డిగ్రీ కళాశాలలో బతుకమ్మ సంబరాలను ఘనంగా నిర్వహించారు.కళాశాల ప్రిన్సిపల్ ప్రొఫెసర్ జై కిషన్ ఓజ అధ్యక్షతన జరిగిన ఈ వేడుకల్లో అధ్యాపక, అధ్యాపకేతర సిబ్బందితో పాటు విద్యార్థినీ, విద్యార్థులు ఉత్సాహంగా పాల్గొన్నారు.ఈ సందర్భంగా విద్యార్థినులు రంగురంగుల పూలతో అందంగా పేర్చిన బతుకమ్మలను తీసుకువచ్చి సంప్రదాయబద్ధంగా వేడుకలు నిర్వహించారు.బతుకమ్మ పాటలు పాడుతూ, ఆటలు ఆడుతూ సంబరాల్లో పాల్గొన్నారు.కళాశాల ప్రాంగణం బతుకమ్మ పాటలు, సందడి నడుమ పండుగ వాతావరణాన్ని సంతరించుకుంది.ఈ కార్యక్రమాన్ని ఉద్దేశించి ప్రిన్సిపల్ ప్రొఫెసర్ జై కిషన్ ఓజ మాట్లాడుతూ.. బతుకమ్మ పండుగ తెలంగాణ సంస్కృతి, సంప్రదాయాల్లో అత్యంత విశిష్టమైన పండుగ అని అన్నారు. ప్రకృతితో మమేకమై పూలను పూజించే ఈ పండుగ తెలంగాణ ఆడపడుచుల ప్రత్యేకతను చాటుతుందని పేర్కొన్నారు.యువతరం మన సంస్కృతి, సంప్రదాయాలను తెలుసుకుని వాటిని భవిష్యత్ తరాలకు అందించాల్సిన బాధ్యత ఉందన్నారు.కళాశాలలో బతుకమ్మ సంబరాలను నిర్వహించడం ద్వారా విద్యార్థుల్లో తెలంగాణ సంస్కృతి, సంప్రదాయాలపై అవగాహన పెంపొందుతుందని తెలిపారు.ఈ కార్యక్రమంలో అధ్యాపకులు,అధ్యాపకేతర సిబ్బంది,విద్యార్థినీ, విద్యార్థులు పాల్గొన్నారు.