‘జై బోలో గణేష్ మహారాజ్’ ..ఉత్సహభరితంగా శోభాయాత్ర

హైదరాబాద్‌లో గణేష్ నిమజ్జన శోభాయాత్ర ఉత్సాహభరితంగా కొనసాగుతోంది. నగరంలోని ఎంజీ మార్కెట్ సర్కిల్ ప్రాంతం ‘జై బోలో గణేష్ మహారాజ్’ నినాదాలతో మారుమోగుతోంది. వివిధ ప్రాంతాల నుంచి భారీ సంఖ్యలో గణనాథులు నిమజ్జనం కోసం తరలివస్తుండటంతో ప్రధాన రహదారులు సందడిగా మారాయి.

మొజంజాహీ మార్కెట్ వద్ద బారులు తీరిన గణనాథులు
నిమజ్జనం కోసం తరలివస్తున్న భారీ గణేష్ విగ్రహాలతో మొజంజాహీ మార్కెట్ పరిసరాలు కిక్కిరిసిపోయాయి. ఒక్కొక్కటిగా గణనాథుల విగ్రహాలు ముందుకు కదులుతుండగా.. వాటిని చూసేందుకు భక్తులు పెద్ద సంఖ్యలో తరలివచ్చారు. దీంతో పరిసర ప్రాంతాల్లో పండుగ వాతావరణం నెలకొంది.

తీన్మార్ డ్యాన్సులు.. డప్పుల మోత
గణేష్ శోభాయాత్రలో భక్తుల ఉత్సాహం అంబరాన్ని తాకుతోంది. తీన్మార్ డ్యాన్సులు, డప్పుల చప్పుళ్లు, బ్యాండ్ మేళాలు, సంగీత హోరు మధ్య గణనాథుల ఊరేగింపు కొనసాగుతోంది. భక్తులు పెద్ద ఎత్తున నృత్యాలు చేస్తూ, జై బోలో గణేష్ మహారాజ్ అంటూ నినాదాలు చేస్తూ సందడి చేస్తున్నారు.

భారీగా పెరిగిన వాహనాల రద్దీ
గణేష్ నిమజ్జన శోభాయాత్ర కారణంగా ప్రధాన మార్గాల్లో వాహనాల రద్దీ గణనీయంగా పెరిగింది. దీంతో పోలీసులు క్షేత్రస్థాయిలో రంగంలోకి దిగి ట్రాఫిక్‌ను క్రమబద్ధీకరిస్తున్నారు. రద్దీ ఎక్కువగా ఉన్న ప్రాంతాల్లో వాహనాలను మళ్లిస్తూ.. శోభాయాత్రకు అంతరాయం కలగకుండా చర్యలు చేపడుతున్నారు.

భక్తుల భద్రత, ట్రాఫిక్ నియంత్రణ కోసం పోలీసులు నిరంతరం పర్యవేక్షణ కొనసాగిస్తున్నారు. మరోవైపు గణనాథుల నిమజ్జనంతో నగరంలో పండుగ సందడి నెలకొంది.