పోలింగ్ కేంద్రాలను పరిశీలించిన రోల్ అబ్జర్వర్

ప్రొద్దుటూరు అర్బన్ మేజర్ న్యూస్:

132-ప్రొద్దుటూరు అసెంబ్లీ నియోజకవర్గ పరిధిలోని పోలింగ్ కేంద్రాలను రాష్ట్ర రోల్ అబ్జర్వర్ చేతన్ టీఎస్, ఐఏఎస్ శుక్రవారం క్షేత్రస్థాయిలో పరిశీలించారు. ఇందులో భాగంగా పోలింగ్ స్టేషన్ నంబర్లు 283, 287లను సందర్శించి అక్కడి పరిస్థితులను, ఎన్నికల నిర్వహణకు సంబంధించి చేపట్టిన ఏర్పాట్లను పరిశీలించారు. ఈ సందర్భంగా ఆయా పోలింగ్ కేంద్రాల్లో ఓటర్ల జాబితా నిర్వహణ, సంబంధిత రికార్డులు, పోలింగ్ కేంద్రాల్లో అందుబాటులో ఉన్న మౌలిక వసతులు, ఎన్నికల విధులకు సంబంధించిన ఏర్పాట్లను రోల్ అబ్జర్వర్ పరిశీలించారు. ఓటర్ల జాబితాకు సంబంధించిన అంశాలు, ఇప్పటివరకు చేపట్టిన చర్యలు, పెండింగ్‌లో ఉన్న అంశాలపై సంబంధిత అధికారులను అడిగి వివరాలు తెలుసుకున్నారు. అనంతరం ఎన్నికల ప్రక్రియకు సంబంధించిన వివిధ అంశాలపై అధికారులతో సమీక్ష నిర్వహించారు. ఓటర్ల జాబితా ప్రక్రియలో నిబంధనలను పాటిస్తూ ఎలాంటి లోపాలకు తావులేకుండా చర్యలు చేపట్టాలని, పోలింగ్ కేంద్రాల్లో అవసరమైన ఏర్పాట్లను సమర్థవంతంగా పూర్తి చేయాలని సూచించినట్లు తెలిసింది. పోలింగ్ కేంద్రాల స్థితిగతులను స్వయంగా పరిశీలించడం ద్వారా ఎన్నికల నిర్వహణకు సంబంధించిన ఏర్పాట్లు, ఓటర్ల జాబితా ప్రక్రియను మరింత పారదర్శకంగా నిర్వహించేందుకు అవసరమైన సూచనలు చేసినట్లు అధికారులు తెలిపారు. ఈ పరిశీలనలో సంబంధిత ఎన్నికల అధికారులు, సిబ్బంది పాల్గొన్నారు.