చాకలి ఐలమ్మ జయంతి వేడుకలు నిర్వహించకపోవడంపై పలువురు అసంతృప్తి

, సూర్య వీణవంక

: తెలంగాణ సాయుధ పోరాట వీరనారి, తెలంగాణ తొలి మహిళా ఉద్యమకారిణి చాకలి ఐలమ్మ జయంతి సందర్భంగా మండలంలో వేడుకలు నిర్వహించకపోవడంపై పలువురు అసంతృప్తి వ్యక్తం చేస్తున్నారు. మహిళా చైతన్యానికి, భూమి కోసం భుక్తి కోసం సాగిన పోరాటానికి ప్రతీకగా నిలిచిన చాకలి ఐలమ్మ జయంతిని మండల నాయకులు విస్మరించడం చర్చనీయాంశంగా మారింది.మహిళా హక్కుల కోసం, పేద ప్రజల ఆత్మగౌరవం కోసం పోరాడిన ఐలమ్మ సేవలను స్మరించుకోవాల్సిన నాయకులు జయంతి వేడుకలు నిర్వహించకపోవడం పట్ల పలువురు ఆవేదన వ్యక్తం చేస్తున్నారు. మహనీయుల జయంతి వేడుకలను అధికారికంగా నిర్వహించి, వారి ఆశయాలను భావితరాలకు తెలియజేయాలని ప్రజలు కోరుతున్నారు.మహనీయుల జయంతులను నిర్వహించడం ద్వారా వారి పోరాట స్ఫూర్తిని భావితరాలకు అందించాల్సిన బాధ్యత నాయకులపై ఉందని పలువురు అభిప్రాయపడుతున్నారు.