తెలంగాణ భక్తిని, సంస్కృతిని ప్రశ్నించే హక్కు ఎవరికీ లేదు రేణూ దేశాయ్ వ్యాఖ్యలకు బీఆర్ఎస్ సీనియర్ నేత ఎడ్ల సుధాకర్ రెడ్డి ఘాటు స్పందన
-
తెలంగాణ భక్తిని, సంస్కృతిని ప్రశ్నించే హక్కు ఎవరికీ లేదు
రేణూ దేశాయ్ వ్యాఖ్యలకు బీఆర్ఎస్ సీనియర్ నేత ఎడ్ల సుధాకర్ రెడ్డి ఘాటు స్పందన
తెలంగాణ బ్యూరో ప్రతినిధిః గణేశ్ ఉత్సవాల సందర్భంగా నటి రేణూ దేశాయ్ చేసిన వ్యాఖ్యలపై బీఆర్ఎస్ సీనియర్ నేత ఎడ్ల సుధాకర్ రెడ్డి స్పందించారు. తెలంగాణ ప్రజల భక్తి, సంస్కృతి, జీవన విధానంపై వ్యాఖ్యలు చేయడం సరికాదని ఆయన పేర్కొన్నారు. తెలంగాణలో భక్తి అయినా, భుక్తి అయినా ప్రజలు బహిరంగంగా, అందరినీ ప్రేమగా ఆదరిస్తూ జరుపుకుంటారని సుధాకర్ రెడ్డి అన్నారు. భక్తి అనేది కేవలం మాటల్లో కాకుండా ఆచరణలో ఉంటుందని, తోటి మనుషులను ప్రేమగా, నిజాయితీగా, ఆప్యాయంగా చూసుకోవడమే తెలంగాణ సంస్కృతిలోని భక్తి భావన అని పేర్కొన్నారు. “మీకు నచ్చనిది ఇతరులకు నచ్చవచ్చు. తెలంగాణ సంస్కృతిని గౌరవించగలిగితే ఇక్కడ ఉండండి.. లేదంటే మీకు నచ్చిన చోట ఉండండి. మీ సర్టిఫికెట్ కోసం తెలంగాణ ప్రజలు ఎదురుచూడటం లేదు” అని ఆయన వ్యాఖ్యానించారు. తెలంగాణ ప్రజలు సూటిగా, స్వేచ్ఛగా, ఆనందంగా జీవించే స్వభావం కలిగిన వారని సుధాకర్ రెడ్డి పేర్కొన్నారు. తెలంగాణలోని ప్రజల సంస్కృతి, ఆచార వ్యవహారాలను ఇతరులు తక్కువ చేసి చూడకూడదని అన్నారు.
అలాగే సత్యయుగం గురించి రేణూ దేశాయ్ చేసిన వ్యాఖ్యలను కూడా ఆయన ప్రస్తావించారు. సత్యయుగంపై తనదైన వ్యాఖ్యానం చేస్తూ, పురాణాల్లో దేవతలు, రాజులు మధుపానీయాలు, నృత్యాలతో కూడిన సందర్భాలు కూడా ఉన్నాయని పేర్కొన్నారు. “తెలంగాణకు మీరు వచ్చారు.. తెలంగాణ మీ దగ్గరకు రాలేదు” అంటూ రేణూ దేశాయ్ వ్యాఖ్యలపై సుధాకర్ రెడ్డి ఘాటుగా స్పందించారు. జై తెలంగాణ అంటూ ముగించారు.
