రేపు బ్యాంకులు పనిచేస్తాయ్..

న్యూఢిల్లీ: బ్యాంకు ఖాతాదారులకు కేంద్ర ప్రభుత్వం కీలక నిర్ణయం తీసుకుంది. సాధారణంగా సెలవు రోజైన సెప్టెంబర్‌ 27, ఆదివారం బ్యాంకులు పనిచేయనున్నాయి. సెప్టెంబర్‌ 28 నుంచి 30 వరకు బ్యాంకు ఉద్యోగ సంఘాలు దేశవ్యాప్త సమ్మెకు పిలుపునిచ్చిన నేపథ్యంలో వినియోగదారులకు ఇబ్బందులు తలెత్తకుండా ఈ నిర్ణయం తీసుకుంది. 

కేంద్ర ఆర్థిక శాఖ నిర్ణయం మేరకు అన్ని ప్రభుత్వ రంగ బ్యాంకులు, ప్రాంతీయ గ్రామీణ బ్యాంకులు సెప్టెంబర్‌ 27న సాధారణంగా పనిచేస్తాయి. భారతీయ రిజర్వు బ్యాంకు కూడా బ్యాంకు శాఖలు, కార్యాలయాలు, ఏటీఎం అనుసంధానిత శాఖలు, కరెన్సీ చెస్టులు ఆదివారం పూర్తిస్థాయిలో పనిచేసేందుకు అనుమతి ఇచ్చింది. 

సెప్టెంబర్‌ 28 నుంచి 30 వరకు మూడు రోజుల సమ్మెకు యునైటెడ్ ఫోరం ఆఫ్ బ్యాంక్ యూనియన్స్ పిలుపునిచ్చింది. ప్రధానంగా ఐదు రోజుల బ్యాంకింగ్‌ వారాన్ని అమలు చేయాలన్న డిమాండ్‌తో ఈ సమ్మెకు పిలుపునిచ్చారు. 

వరుస సెలవులు, సమ్మె కారణంగా బ్యాంకింగ్‌ సేవలు ఐదు రోజుల పాటు ప్రభావితమయ్యే అవకాశం ఉండటంతో వినియోగదారుల సౌకర్యార్థం ఆదివారం బ్యాంకులను తెరవాలని కేంద్రం నిర్ణయించింది. అయితే కొన్ని బ్యాంకు ఉద్యోగ సంఘాలు ఆదివారం విధులకు హాజరుకావద్దని సూచించడంతో శాఖల కార్యకలాపాల విషయంలో కొంత అనిశ్చితి కొనసాగుతోంది. 

ముఖ్యంగా: కేంద్రం అధికారిక ప్రకటనలో ఆదివారం తెరిచి ఉండేవిగా ప్రభుత్వ రంగ, ప్రాంతీయ గ్రామీణ బ్యాంకులను పేర్కొంది. కాబట్టి ప్రతి ప్రైవేటు బ్యాంకు శాఖ కూడా తప్పనిసరిగా పనిచేస్తుందని భావించకండి.