నాగాలాండ్లో కల్తీ మద్యం కలకలం.. 19 మంది మృతి
నాగాలాండ్లో కల్తీ మద్యం ప్రాణాలు తీసింది. రెండు రోజుల వ్యవధిలో కల్తీ మద్యం సేవించినట్లు అనుమానిస్తున్న 19 మంది మృతి చెందారు. ఘటనపై ప్రభుత్వం తీవ్రంగా స్పందించి దర్యాప్తు కోసం ప్రత్యేక దర్యాప్తు బృందాన్ని ఏర్పాటు చేసింది.
కల్తీ మద్యం విక్రయాలు, సరఫరా వెనుక ఉన్న వ్యక్తులను గుర్తించేందుకు పోలీసులు పలు ప్రాంతాల్లో విస్తృతంగా సోదాలు నిర్వహించారు. ఈ తనిఖీల్లో ఇప్పటివరకు 19 మందిని అరెస్ట్ చేశారు. వారి నుంచి దాదాపు 3 వేల మద్యం బాటిళ్లను స్వాధీనం చేసుకున్నారు.
మద్యం నమూనాలను పోలీసులు ఫోరెన్సిక్ పరీక్షలకు పంపించారు. మద్యంలో విషపూరిత లేదా ప్రమాదకర రసాయనాలు కలిశాయా? వాటి కారణంగానే మరణాలు సంభవించాయా? అనే అంశాలపై అధికారులు దర్యాప్తు చేస్తున్నారు. మృతుల మృతదేహాలకు సంబంధించిన వైద్య పరీక్షల నివేదికలు కూడా కీలకంగా మారనున్నాయి.
కల్తీ మద్యం తయారీ, సరఫరా, విక్రయాల్లో ఎవరెవరి ప్రమేయం ఉందనే కోణంలో ప్రత్యేక దర్యాప్తు బృందం విచారణ కొనసాగిస్తోంది. ఘటనకు బాధ్యులైన వారిపై కఠిన చర్యలు తీసుకుంటామని అధికారులు స్పష్టం చేశారు.
