దేశంలోనే తొలి ఎల్ఎన్జి రైలు ప్రారంభం
రూ. 1,472 కోట్ల రైల్వే ప్రాజెక్టులను ప్రారంభించిన అమిత్ షా
సూర్య జాతీయ డెస్క్: భారత రైల్వే రంగాన్ని మరింత పర్యావరణహితంగా, సురక్షితంగా తీర్చిదిద్దే దిశగా గుజరాత్లోని అహ్మదాబాద్ సబర్మతి రైల్వే స్టేషన్ వేదికగా చారిత్రాత్మక ఘట్టం ఆవిష్కృతమైంది. కేంద్ర హోంశాఖ మంత్రి అమిత్ షా గుజరాత్ ముఖ్యమంత్రి భూపేంద్ర పటేల్తో కలిసి దేశంలోనే మొట్టమొదటి ఎల్ఎన్జి (LNG-ద్రవీకృత సహజ వాయువు) శక్తితో నడిచే రైలును ఆకుపచ్చ జెండా ఊపి ప్రారంభించారు. దీంతో పాటు అహ్మదాబాద్ పరిధిలో రూ. 1,472 కోట్ల వ్యయంతో చేపట్టిన పలు కీలక రైల్వే అభివృద్ధి ప్రాజెక్టులకు ఆయన శ్రీకారం చుట్టారు. ఇందులో భాగంగా రూ. 700 కోట్ల వ్యయంతో నిర్మించిన భారీ డబ్ల్యూఏజి-12 (WAG-12) లోకోమోటివ్ నిర్వహణ షెడ్ను కూడా అమిత్ షా జాతికి అంకితం చేశారు.
ఈ సందర్భంగా అమిత్ షా మాట్లాడుతూ, ఎల్ఎన్జి రైలు ప్రారంభం పర్యావరణ పరిరక్షణలో భారత రైల్వే మైలురాయిగా నిలుస్తుందన్నారు. రైలు ప్రమాదాల నివారణకు ఉద్దేశించిన 'కవచ్' (Kavach) రైలు రక్షణ వ్యవస్థను సబర్మతి-కలోల్-సబర్మతి సెక్షన్లో రూ. 48 కోట్లతో అందుబాటులోకి తెచ్చినట్లు వెల్లడించారు. అలాగే అహ్మదాబాద్-పాలన్పూర్, అహ్మదాబాద్-సమాఖియాలీ మార్గాల్లో కవచ్ పనులతో పాటు సబర్మతి-సర్కేజ్ రైల్వే లైన్ రెట్టింపు పనులకు శంకుస్థాపన చేశారు. 12,000 హార్స్ పవర్ సామర్థ్యం కలిగిన డబ్ల్యూఏజి-12 లోకోమోటివ్స్ ఏకంగా 600 ట్రక్కులకు సమానమైన సరుకును ఒకేసారి చేరవేసే సామర్థ్యాన్ని కలిగి ఉన్నాయని కొనియాడారు.
రైల్వే విద్యుదీకరణ వేగంగా జరుగుతోందని, 2014 కంటే ముందు 30 శాతంగా ఉన్న రైల్వే విద్యుదీకరణ ప్రస్తుతం 99.6 శాతానికి చేరిందని అమిత్ షా తెలిపారు. దీనివల్ల రైల్వే డీజిల్ వినియోగం 2015-16లోని 293 కోట్ల లీటర్ల నుంచి 2024-25 నాటికి 108 కోట్ల లీటర్లకు గణనీయంగా తగ్గిందని చెప్పారు. ప్రధాని నరేంద్ర మోదీ నాయకత్వంలో మేక్ ఇన్ ఇండియా, ఆత్మనిర్భర్ భారత్ ద్వారా స్వదేశీ సాంకేతికతతో రైల్వే ఆస్తుల తయారీ పెరిగిందని, గుజరాత్ రాష్ట్ర రైల్వే బడ్జెట్ కేటాయింపులు 2009-14 మధ్య రూ. 589 కోట్లు మాత్రమే ఉంటే, 2026-27 ఆర్థిక సంవత్సరానికి గాను ఏకంగా రూ. 17,366 కోట్లకు పెరిగాయని వివరించారు.
