telanagana
అనంతగిరి ఘాట్ బస్సు ప్రమాదం.. డ్రైవర్ అరెస్ట్
నలుగురు మృతి.. పలువురికి గాయాలు | డ్రైవర్‌కు జ్యుడీషియల్ రిమాండ్
వికారాబాద్ జిల్లా ప్రతినిధి, మేజర్ న్యూస్ (అక్టోబర్ 5): అనంతగిరి ఘాట్ రోడ్డులోని కేరెల్లి గ్రామ శివారులో ఈ నెల 3న జరిగిన ప్రైవేట్ ట్రావెల్స్ బస్సు ప్రమాదంలో నలుగురు మృతి చెందగా, పలువురు గాయపడ్డారని సీఐ రఘురాములు తెలిపారు. ప్రమాదానికి కారణమైన బస్సు డ్రైవర్‌ను సోమవారం పోలీసులు అరెస్ట్ చేసి న్యాయస్థానంలో హాజరుపరచగా, జ్యుడీషియల్ రిమాండ్‌కు పంపినట్లు ఆయన వెల్లడించారు.సీఐ రఘురాములు తెలిపిన వివరాల ప్రకారం.. అక్టోబర్ 3న అనంతగిరి ఘాట్ రోడ్డులోని కేరెల్లి గ్రామ శివారులో ప్రైవేట్ ట్రావెల్స్ బస్సు అదుపుతప్పి బోల్తా పడింది. ఈ ప్రమాదంలో నలుగురు మృతి చెందగా, పలువురు గాయపడ్డారు. సమాచారం అందిన వెంటనే పోలీసులు సంఘటనా స్థలానికి చేరుకుని స్థానికుల సహకారంతో సహాయక చర్యలు చేపట్టారు. గాయపడిన వారిని వివిధ ఆసుపత్రులకు తరలించి చికిత్స అందేలా చర్యలు తీసుకున్నారు.ప్రమాదంపై దర్యాప్తు చేపట్టిన పోలీసులు బస్సు డ్రైవర్ పాళ్త్యా వాసుదేవ్ అలియాస్ వాసు (30), తండ్రి ధర్మా నాయక్, సంగమేష్ తండా, రేగోడ్ మండలం, మెదక్ జిల్లాకు చెందిన వ్యక్తిని ప్రమాదానికి బాధ్యుడిగా గుర్తించారు. దీంతో అక్టోబర్ 5న అతడిని అరెస్ట్ చేసి న్యాయస్థానం ముందు హాజరుపరచగా జ్యుడీషియల్ రిమాండ్ విధించినట్లు సీఐ తెలిపారు.ప్రమాదానికి గల పూర్తి కారణాలపై దర్యాప్తు కొనసాగుతోందని రఘురాములు తెలిపారు. నిర్లక్ష్యంగా, అజాగ్రత్తగా వాహనాలు నడిపి ప్రజల ప్రాణాలకు ముప్పు కలిగించే వారిపై చట్టప్రకారం కఠిన చర్యలు తీసుకుంటామని ఆయన హెచ్చరించారు.
