అంగన్‌వాడీ టీచర్‌ పోస్టు రిజర్వేషన్‌లో గందరగోళం.. ఆఫ్‌లైన్‌లో బీసీ-డీ, ఆన్‌లైన్‌లో ఈడబ్ల్యూఎస్‌..!
వికారాబాద్ జిల్లా ప్రతినిధి, మేజర్‌ న్యూస్‌: అంగన్‌వాడీ టీచర్‌ పోస్టు భర్తీకి సంబంధించి ఆఫ్‌లైన్‌, ఆన్‌లైన్‌ నోటిఫికేషన్లలో వేర్వేరు రిజర్వేషన్లు పేర్కొనడం అభ్యర్థులను అయోమయానికి గురిచేస్తోంది. వికారాబాద్ జిల్లా దోమ మండలం రాకొండ గ్రామంలో ఖాళీగా ఉన్న అంగన్‌వాడీ టీచర్‌ పోస్టుకు సంబంధించి జిల్లా సంక్షేమ శాఖ అధికారి కార్యాలయం నుంచి వెలువడిన ఆఫ్‌లైన్‌ ప్రొసీడింగ్‌లో బీసీ-డీ రిజర్వేషన్‌ పేర్కొనగా, ఆన్‌లైన్‌లో మాత్రం ఈడబ్ల్యూఎస్‌ రిజర్వేషన్‌ చూపించడంతో దరఖాస్తు చేసుకునే అభ్యర్థుల్లో గందరగోళం నెలకొంది.జిల్లాలో ఖాళీగా ఉన్న అంగన్‌వాడీ టీచర్‌ పోస్టుల భర్తీకి సంబంధించి అధికారులు నోటిఫికేషన్‌ విడుదల చేశారు. ఇందులో భాగంగా రాకొండ గ్రామంలోని పోస్టుకు దరఖాస్తు చేసుకోవాలని భావించిన అభ్యర్థులు రిజర్వేషన్‌ వివరాలను పరిశీలించగా, రెండు నోటిఫికేషన్లలో వేర్వేరు కేటగిరీలు కనిపించడంతో ఏ రిజర్వేషన్‌ను ప్రామాణికంగా తీసుకోవాలో తెలియక ఆందోళనకు గురవుతున్నారు. ఒకే పోస్టుకు రెండు రకాల రిజర్వేషన్లు ఎలా వచ్చాయన్న ప్రశ్నలు తలెత్తుతున్నాయి.
అధికారులు స్పష్టత ఇవ్వాలి
ప్రభుత్వ ఉద్యోగాల భర్తీ ప్రక్రియలో రిజర్వేషన్ల వివరాలు కీలకమైనవి. ఇలాంటి సందర్భాల్లో నోటిఫికేషన్లలో వ్యత్యాసాలు ఉండటం వల్ల అర్హులైన అభ్యర్థులు నష్టపోయే అవకాశం ఉంది. కాబట్టి సంబంధిత అధికారులు ఈ విషయంపై వెంటనే స్పందించి, రాకొండ అంగన్‌వాడీ టీచర్‌ పోస్టుకు వర్తించే అసలు రిజర్వేషన్‌ ఏదో స్పష్టం చేయాలని అభ్యర్థులు కోరుతున్నారు. అవసరమైతే ఆన్‌లైన్‌ వివరాలను సరిచేసి, అభ్యర్థులకు ఎలాంటి ఇబ్బందులు కలగకుండా చర్యలు తీసుకోవాలని విజ్ఞప్తి చేస్తున్నారు.ఈ రిజర్వేషన్‌ వ్యత్యాసానికి కారణాలేమిటి..? ఆఫ్‌లైన్‌ ప్రొసీడింగ్‌ సరైనదా, ఆన్‌లైన్‌ వివరాల్లో పొరపాటు జరిగిందా? అనే అంశాలపై జిల్లా సంక్షేమ శాఖ అధికారులు స్పష్టత ఇవ్వాల్సి ఉంది.
