ధరల మంట: పండగ పూట సామాన్యుడి కంట కన్నీరు!
పండగ వచ్చిందంటే ఒకప్పుడు పల్లెల్లో, పట్టణాల్లో సంబరాలు అంబరాన్నంటేవి. కానీ నేడు పండగ పేరు వింటేనే పేద, మధ్యతరగతి ప్రజల గుండెల్లో గుబులు మొదలవుతోంది. ఐజ మండల పరిధిలో గత కొద్ది రోజులుగా నిత్యావసర సరుకుల ధరలు చుక్కలనంటుతుండటంతో సామాన్యుడి బతుకు భారంగా మారింది.
ఒకప్పుడు వందల రూపాయలతో ఘనంగా జరుపుకున్న పండుగలు, నేడు వేలకు వేలు గుమ్మరించినా కనీస అవసరాలు కూడా తీరని దుస్థితికి చేరాయి. నూనెలు, పప్పులు, కూరగాయల నుంచి మొదలుకొని పూజా సామాగ్రి వరకు ప్రతి వస్తువు ధర రెట్టింపు కావడంతో ప్రజల జేబులకు భారీగా చిల్లులు పడుతున్నాయి. రోజువారీ కూలీలతో పొట్టపోసుకునే కుటుంబాలు పండగ పూట పస్తులుండాల్సిన పరిస్థితులు దాపురిస్తున్నాయి.
ధరల పెరుగుదలపై ప్రశ్నిస్తే అధికారులు 'ఎల్ నినో ప్రభావం', 'దిగుబడి తగ్గింది' అంటూ సాంకేతిక కారణాలు చెబుతూ చేతులు దులుపుకుంటున్నారే తప్ప, క్షేత్రస్థాయిలో ధరల నియంత్రణకు ఎటువంటి చర్యలు చేపట్టడం లేదని మండల ప్రజలు తీవ్ర ఆవేదన వ్యక్తం చేస్తున్నారు. వ్యాపారులు కృత్రిమ కొరత సృష్టించి అధిక ధరలకు విక్రయిస్తున్నా తనిఖీలు చేపట్టే నాథుడే కరువయ్యాడు.
"ప్రభుత్వం, అధికారులు ఇప్పటికైనా స్పందించి నిత్యావసరాల ధరలను అదుపు చేయాలి. రేషన్ దుకాణాల ద్వారా నాణ్యమైన సరుకులను పంపిణీ చేసి, మార్కెట్లలో ప్రత్యేక నిఘా ఏర్పాటు చేస్తేనే పేదల ఇళ్లలో పొయ్యి వెలుగుతుంది" అని మండల వాసులు వేడుకుంటున్నారు. పాలకులు, ఉన్నతాధికారులు తక్షణమే దృష్టి సారించి సామాన్యుడికి పండగ పూట ఊరట కల్పించాలని ప్రజాసంఘాలు డిమాండ్ చేస్తున్నాయి.
