మనోజ్ బాజ్‌పాయ్ 'గజబ్ రాత్' ట్రైలర్ రిలీజ్.. వివాదం తర్వాత మారిన టైటిల్, స్ట్రీమింగ్ ఎప్పుడంటే?
సూర్య ఎంటర్‌టైన్‌మెంట్ డెస్క్: బాలీవుడ్ వైవిధ్యభరిత నటుడు మనోజ్ బాజ్‌పాయ్ ప్రధాన పాత్రలో నటించిన లేటెస్ట్ క్రైమ్ అండ్ సస్పెన్స్ థ్రిల్లర్ మూవీ 'గజబ్ రాత్'. నీరజ్ పాండే, రితేశ్ షా సంయుక్త దర్శకత్వంలో తెరకెక్కిన ఈ భారీ ప్రాజెక్ట్ కి సంబంధించిన అఫీషియల్ ట్రైలర్‌ను మేకర్స్ తాజాగా విడుదల చేశారు. ఈ చిత్రంలో మనోజ్ బాజ్‌పాయ్ శక్తివంతమైన పోలీస్ అధికారి పాత్రలో కనిపించి అభిమానులను మెప్పించనున్నారు. తాజాగా విడుదలైన ట్రైలర్ సీన్స్ ఉత్కంఠభరితంగా ఉంటూ సినిమాపై అంచనాలను ఒక్కసారిగా పెంచేశాయి.
ఈ సినిమా టైటిల్ వెనుక పెద్ద వివాదమే నడిచింది. మొదట ఈ చిత్రానికి 'ఘూసఖోర్ పండత్' అనే పేరును ఖరారు చేసి, ఆ టైటిల్‌తోనే కొన్ని ప్రచార చిత్రాలను కూడా విడుదల చేశారు. అయితే ఆ సినిమా పేరు మరియు మనోజ్ పాత్ర తీరు తమ వర్గాన్ని కించపరిచేలా ఉన్నాయని బ్రాహ్మణ సంఘాలు తీవ్ర ఆగ్రహం వ్యక్తం చేశాయి. చిత్ర దర్శకులపై ఫిర్యాదు చేయడమే కాకుండా సినిమా విడుదలను నిలిపివేయాలని కోరుతూ కోర్టును కూడా ఆశ్రయించాయి. దాంతో వివాదాలకు తావులేకుండా మేకర్స్ వెంటనే స్పందించి సినిమా పేరును 'గజబ్ రాత్'గా మార్చారు.
వివాదాలన్నీ ముగియడంతో ఈ చిత్రం నేరుగా ప్రముఖ ఓటీటీ వేదిక నెట్‌ఫ్లిక్స్‌లో విడుదలకానుంది. అక్టోబర్ 23 నుంచి ఈ సినిమా నెట్‌ఫ్లిక్స్‌లో ప్రసారం కానున్నట్లు మేకర్స్ ధ్రువీకరించారు. ఈ చిత్రంలో నుష్రత్ భరుచ్చా, సాకిబ్ సలీమ్, దివ్యా దత్తా, కికు శారదా, శ్రద్ధా దాస్ తదితరులు కీలక పాత్రలు పోషించారు. సస్పెన్స్, థ్రిల్లర్ ఎలిమెంట్స్‌తో రూపుదిద్దుకున్న ఈ చిత్రం ఓటీటీ వీక్షకులను విశేషంగా ఆకట్టుకుంటుందని చిత్ర యూనిట్ ధీమా వ్యక్తం చేస్తోంది.
