రోబోటిక్ సర్జరీతో 25 ఏళ్ల యువతికి విజయవంతంగా చికిత్స పాత్రికేయుల సమావేశంలో వివరాలు వెల్లడించిన యశోద ఆసుపత్రి వైద్యులు
సూర్య మంచిర్యాల టౌన్ : కుడివైపు నడుము నొప్పి, మూత్రం తగ్గిపోవడం, కింది పొత్తికడుపులో నొప్పితో బాధపడుతున్న 25 ఏళ్ల యువతికి మలక్‌పేట్ యశోద సూపర్ స్పెషాలిటీ ఆసుపత్రిలో రోబోటిక్ సర్జరీ ద్వారా విజయవంతంగా చికిత్స అందించినట్లు వైద్యులు తెలిపారు. ఈ వివరాలను మంచిర్యాలలోని ఓ ప్రైవేట్ హాల్‌లో నిర్వహించిన పాత్రికేయుల సమావేశంలో వెల్లడించారు.వైద్య పరీక్షల్లో యువతికి కుడివైపు దిగువ మూత్రనాళం సంకుచితమైనట్లు (డిస్టల్ యూరెటరిక్ స్ట్రిక్చర్), దాని పైభాగం విస్తరించినట్లు గుర్తించారు. ఈ సమస్యకు పరిష్కారంగా వైద్యులు రోబోటిక్ రైట్ యూరెటరిక్ రీ-ఇంప్లాంటేషన్ శస్త్రచికిత్స నిర్వహించారు. శస్త్రచికిత్స సమయంలో మూత్రనాళం సంకుచితమవడంతో పాటు, మూత్రాశయం, ముందు పొత్తికడుపు గోడ మధ్య అతుకులు ఉన్నట్లు గుర్తించినట్లు వివరించారు.శస్త్రచికిత్స అనంతరం యువతి ఎలాంటి సమస్యలు లేకుండా కోలుకున్నారని, ఆరోగ్య పరిస్థితి స్థిరంగా ఉండటంతో ఆసుపత్రి నుంచి డిశ్చార్జి చేసినట్లు తెలిపారు.ఈ సందర్భంగా కన్సల్టెంట్ యూరాలజిస్ట్, ఆండ్రాలజిస్ట్, యూరో-ఆంకాలజిస్ట్, రోబోటిక్ అండ్ రీనల్ ట్రాన్స్‌ప్లాంట్ సర్జన్ డాక్టర్ యశస్వి రెడ్డి టి. మాట్లాడుతూ.. మూత్రనాళం సంకుచితం కావడం వల్ల మూత్ర ప్రవాహానికి ఆటంకం ఏర్పడి నడుము నొప్పి, మూత్రం తగ్గిపోవడం వంటి సమస్యలు తలెత్తుతాయని పేర్కొన్నారు. సమస్య ఉన్న ప్రాంతాన్ని బట్టి రోబోటిక్ శస్త్రచికిత్స నిర్వహించినట్లు తెలిపారు.శస్త్రచికిత్స అనంతరం వైద్యుల సూచనల మేరకు క్రమం తప్పకుండా ఫాలోఅప్ చేయించుకోవాలని సూచించారు. అవసరాన్ని బట్టి మూడు నెలల తర్వాత డీటీపీ ఏ (DTPA) రీనోగ్రామ్ పరీక్ష నిర్వహించాల్సి రావచ్చని వివరించారు. ఈ శస్త్రచికిత్సకు డాక్టర్ పరిక్షిత్ అనస్థీషియా సేవలు అందించారు.నడుము నొప్పి, మూత్రం తగ్గిపోవడం వంటి లక్షణాలను నిర్లక్ష్యం చేయకుండా సకాలంలో యూరాలజిస్ట్‌ను సంప్రదించాలని యశోద ఆసుపత్రి అసోసియేట్ వైస్ ప్రెసిడెంట్ శ్రీనివాస్ చిదుర సూచించారు. ఆసుపత్రిలో అధునాతన సాంకేతిక పరిజ్ఞానంతో కూడిన యూరాలజీ వైద్య సేవలు అందుబాటులో ఉన్నాయని తెలిపారు.
