మంగళూరు ఎయిర్పోర్టులో ఇండిగో విమానానికి తప్పిన పెను ప్రమాదం
మంగళూరు, నవంబర్ 17: మంగళూరు అంతర్జాతీయ విమానాశ్రయంలో మంగళవారం ఇండిగో విమానానికి పెను ప్రమాదం తప్పింది. మంగళూరు నుంచి బెంగళూరుకు బయలుదేరాల్సిన ఇండిగో విమానం (ఫ్లైట్ నంబర్ 6E 388) రన్వేపై టేకాఫ్ అవుతున్న సమయంలో ఒక్కసారిగా సాంకేతిక లోపం తలెత్తింది. తక్షణమే అప్రమత్తమైన పైలట్ విమానాన్ని రన్వేపైనే సురక్షితంగా నిలిపివేయడంతో పెను ముప్పు తప్పింది.
ఈ ఘటన జరిగిన సమయంలో విమానంలో 229 మంది ప్రయాణికులు, 7 గురు సిబ్బంది కలిపి మొత్తం 236 మంది ఉన్నారు. వారంతా క్షేమంగా బయటపడటంతో విమానాశ్రయ అధికారులు, ప్రయాణికులు ఊపిరి పీల్చుకున్నారు. కాగా, టేకాఫ్ సమయంలో విమానం టైరు పేలి మంటలు చెలరేగాయని స్థానికంగా కథనాలు వెలువడగా, ఇండిగో సంస్థ మాత్రం దీనిని కేవలం 'సాంకేతిక సమస్య'గా మాత్రమే పేర్కొంది. అనంతరం ఆ విమానాన్ని గ్రౌండెడ్ (Aircraft on Ground - AOG) చేసి, నిపుణుల బృందంతో క్షుణ్ణంగా తనిఖీలు నిర్వహిస్తున్నారు. ప్రయాణికులను గమ్యస్థానాలకు చేర్చేందుకు ప్రత్యామ్నాయ ఏర్పాట్లు చేశారు.