మండల పూజలకు సిద్ధమైన శబరిమల.. ఎల్లుండి సాయంత్రం దర్శనాల ప్రారంభం

శబరిమల: వార్షిక మండల-మకరవిళక్కు యాత్ర కోసం శబరిమల శ్రీ ధర్మశాస్తా ఆలయం ముస్తాబైంది. ఎల్లుండి (నవంబర్ 16, సోమవారం) సాయంత్రం 4 గంటలకు ఆలయ తలుపులను తెరవనున్నారు. 17వ తేదీ ఉదయం ప్రత్యేక పూజలు, అభిషేకాలు నిర్వహించిన అనంతరం భక్తులను అయ్యప్ప స్వామి దర్శనానికి అనుమతించనున్నారు.

యాత్రకు వచ్చే భక్తుల సౌకర్యార్థం ట్రావెన్‌కోర్ దేవస్వం బోర్డు (TDB) పలు కీలక ఏర్పాట్లు చేసింది. పంబ నుండి సన్నిధానం వరకు సాగే కొండ ఎక్కే ట్రెక్కింగ్ మార్గంలో భక్తులు సేదతీరేందుకు వీలుగా పలుచోట్ల స్టెయిన్‌లెస్ స్టీల్ సీటింగ్ సౌకర్యాలను కొత్తగా ఏర్పాటు చేశారు.

దీంతో పాటు, యాత్రా సమయంలో భక్తులకు రక్షణ కల్పిస్తూ దేవస్వం బోర్డు కీలక నిర్ణయం తీసుకుంది. యాత్రకు వచ్చిన భక్తులు ఎవరైనా ప్రమాదవశాత్తు మరణిస్తే, వారి కుటుంబాలకు ఆర్థిక భరోసాగా రూ. 2 లక్షల జీవిత బీమా (లైఫ్ ఇన్సూరెన్స్) అందించనున్నట్లు అధికారులు ప్రకటించారు.