దుండిగల్‌లో వైద్య సేవలకు సిబ్బంది కొరత.. చిన్నారుల టీకాలపై ఆందోళన

                                 *22న పల్స్ పోలియో కార్యక్రమంపై నర్సారెడ్డి శ్రీనివాస్ రెడ్డి ఆందోళన

దుండిగల్ మేజర్ న్యూస్ :     కుత్బుల్లాపూర్ నియోజకవర్గ పరిధిలోని దుండిగల్ సర్కిల్‌లో వైద్య ఆరోగ్య సేవలు కుంటుపడుతున్నాయని భౌరంపేట్ మాజీ కౌన్సిలర్ నర్సారెడ్డి శ్రీనివాస్ రెడ్డి ఆవేదన వ్యక్తం చేశారు. సిబ్బంది కొరత, పర్మినెంట్ ఉద్యోగుల బదిలీలు, కాంట్రాక్ట్ సిబ్బంది ఆందోళనల కారణంగా ప్రజలకు అందాల్సిన వైద్య సేవలకు తీవ్ర అంతరాయం ఏర్పడుతోందని ఆయన ప్రభుత్వంపై విమర్శలు చేశారు. ముఖ్యంగా చిన్నారులకు అందించాల్సిన టీకాల కార్యక్రమం సక్రమంగా జరగకపోవడం ఆందోళన కలిగించే అంశమన్నారు. దుండిగల్ సర్కిల్ పరిధిలో గతంలో పది మంది పర్మినెంట్ ఏఎన్‌ఎంలు విధులు నిర్వహించేవారని, వారిని హైదరాబాద్ చుట్టుపక్కల ఉన్న ఇతర రూరల్ ప్రాంతాలకు బదిలీ చేసినప్పటికీ వారి స్థానాల్లో తగిన శాశ్వత నియామకాలు చేపట్టలేదని నర్సారెడ్డి శ్రీనివాస్ రెడ్డి తెలిపారు. ప్రస్తుతం సుమారు 120 మంది ఆరోగ్య సిబ్బంది విధులు నిర్వహిస్తుండగా, వారిలో కేవలం నలుగురు మాత్రమే పర్మినెంట్ ఉద్యోగులు ఉన్నారని పేర్కొన్నారు. మిగిలిన వారిలో ఎక్కువ మంది కాంట్రాక్ట్ ఏఎన్‌ఎంలు, ఆశా వర్కర్లు, ఆయాలు తదితర సిబ్బంది ఉన్నారని తెలిపారు. ప్రభుత్వ వైద్య ఆరోగ్య వ్యవస్థలో ఇంత భారీ సంఖ్యలో సిబ్బంది ఉన్నప్పటికీ పర్మినెంట్ ఉద్యోగుల సంఖ్య చాలా తక్కువగా ఉండటం వల్ల పరిపాలనాపరమైన సమస్యలతో పాటు ప్రజలకు వైద్య సేవలు అందించడంలోనూ ఇబ్బందులు తలెత్తుతున్నాయని ఆయన అన్నారు. పర్మినెంట్ సిబ్బందిని ఇతర ప్రాంతాలకు బదిలీ చేసి, వారి స్థానాలను భర్తీ చేయకపోవడం ప్రభుత్వ నిర్లక్ష్యానికి నిదర్శనమని విమర్శించారు. ఇదిలా ఉండగా కాంట్రాక్ట్ ఏఎన్‌ఎంలు, ఆశా వర్కర్లు, ఆయాలు తమ వేతనాల పెంపు, ఉద్యోగాల క్రమబద్ధీకరణ, ఇతర న్యాయమైన డిమాండ్ల సాధన కోసం ధర్నాలు, ఆందోళనలు కొనసాగిస్తున్నారని తెలిపారు. వారి సమస్యలపై ప్రభుత్వం తక్షణమే స్పందించి చర్చలు జరపాల్సి ఉన్నప్పటికీ, ఇప్పటివరకు తగిన చర్యలు తీసుకోకపోవడంతో వైద్య సేవలపై ప్రభావం పడుతోందని అన్నారు. సిబ్బంది ఆందోళనల కారణంగా పలు పీహెచ్‌సీ కేంద్రాల్లో సాధారణ వైద్య సేవలు సైతం సక్రమంగా అందడం లేదని నర్సారెడ్డి శ్రీనివాస్ రెడ్డి తెలిపారు. ముఖ్యంగా గత 20 రోజులుగా కొన్ని పీహెచ్‌సీలలో చిన్నారులకు నిర్ణీత షెడ్యూల్ ప్రకారం అందించాల్సిన టీకాల కార్యక్రమం నిలిచిపోయిందని ఆరోపించారు. పిల్లలకు టీకాలు వేయించేందుకు పీహెచ్‌సీలకు వస్తున్న తల్లిదండ్రులు నిరాశతో వెనుదిరగాల్సి వస్తోందని ఆవేదన వ్యక్తం చేశారు. చిన్నారుల ఆరోగ్య పరిరక్షణలో టీకాలు అత్యంత కీలకమని, ఈ కార్యక్రమంలో ఏమాత్రం జాప్యం జరిగినా ప్రజల్లో ఆందోళన నెలకొంటుందని ఆయన పేర్కొన్నారు. ఉద్యోగుల సమస్యలను పరిష్కరించడంతో పాటు ప్రజలకు వైద్య సేవలు నిరంతరాయంగా అందేలా ప్రత్యామ్నాయ ఏర్పాట్లు చేయాల్సిన బాధ్యత ప్రభుత్వంపై ఉందన్నారు. ముఖ్యంగా ఈ నెల 22వ తేదీన నిర్వహించనున్న పల్స్ పోలియో కార్యక్రమంపైనా ప్రస్తుత పరిస్థితులు ప్రభావం చూపే అవకాశం ఉందని నర్సారెడ్డి శ్రీనివాస్ రెడ్డి ఆందోళన వ్యక్తం చేశారు. ఇప్పటికే పీహెచ్‌సీ కేంద్రాల్లో సిబ్బంది కొరత, ఆరోగ్య సిబ్బంది ధర్నాలు కొనసాగుతున్న నేపథ్యంలో సమస్యలకు తక్షణ పరిష్కారం చూపకపోతే క్షేత్రస్థాయిలో పల్స్ పోలియో కార్యక్రమాన్ని ఎలా నిర్వహిస్తారని ప్రశ్నించారు. చిన్నారులకు పోలియో చుక్కలు వేయాల్సిన కీలక కార్యక్రమానికి అవసరమైన సిబ్బంది అందుబాటులో లేకపోతే లక్ష్యాన్ని ఎలా సాధిస్తారని ఆయన ఆవేదన వ్యక్తం చేశారు.ఈ నేపథ్యంలో ప్రభుత్వం ముందస్తు చర్యలు చేపట్టి పల్స్ పోలియో కార్యక్రమానికి ఎలాంటి ఆటంకం కలగకుండా అవసరమైన వైద్య, ఆరోగ్య సిబ్బందిని అందుబాటులో ఉంచాలని ఆయన డిమాండ్ చేశారు. ఈ నెల 22వ తేదీలోపే కాంట్రాక్ట్ ఆరోగ్య సిబ్బంది సమస్యలను పరిష్కరించి, పీహెచ్‌సీలను పూర్తిస్థాయిలో పనిచేసేలా చర్యలు తీసుకోవాలని కోరారు. పెండింగ్‌లో ఉన్న చిన్నారుల టీకాలను వెంటనే అందించేందుకు ప్రత్యేక వైద్య బృందాలను ఏర్పాటు చేయాలని సూచించారు. అలాగే దుండిగల్ సర్కిల్‌లో అవసరమైన సంఖ్యలో పర్మినెంట్ ఏఎన్‌ఎంలు, ఇతర వైద్య ఆరోగ్య సిబ్బందిని నియమించాలని, బదిలీలతో ఖాళీ అయిన పోస్టులను వెంటనే భర్తీ చేయాలని నర్సారెడ్డి శ్రీనివాస్ రెడ్డి ప్రభుత్వాన్ని డిమాండ్ చేశారు. ఉద్యోగుల న్యాయమైన సమస్యలను పరిష్కరించడంతో పాటు ప్రజలకు అందాల్సిన వైద్య సేవలకు ఎలాంటి అంతరాయం కలగకుండా ప్రభుత్వం సమగ్ర చర్యలు చేపట్టాలని కోరారు. పీహెచ్‌సీలను పూర్తిస్థాయిలో అందుబాటులోకి తీసుకురావడంతో పాటు టీకాలు, పల్స్ పోలియో వంటి కీలక కార్యక్రమాలు విజయవంతంగా నిర్వహించేలా పటిష్టమైన సిబ్బంది వ్యవస్థను ఏర్పాటు చేయాలని నర్సారెడ్డి శ్రీనివాస్ రెడ్డి డిమాండ్ చేశారు.