బస్తీల్లో మౌలిక వసతుల కల్పనే లక్ష్యంగా అభివృద్ధి పనులు - ఎమ్మెల్యే తలసాని

సికింద్రాబాద్ మేజర్ న్యూస్ : ప్రజల అవసరాలను దృష్టిలో ఉంచుకొని అందుకు అనుగుణంగా అభివృద్ధి పనులు చేపడుతున్నట్లు మాజీమంత్రి, సనత్ నగర్ ఎమ్మెల్యే తలసాని శ్రీనివాస్ యాదవ్ తెలిపారు. శుక్రవారం బేగంపేట డివిజన్ లోని వికార్ నగర్, వడ్డెర బస్తీ లలో 26 లక్షల రూపాయల వ్యయంతో చేపట్టనున్న సీసీ రోడ్ల నిర్మాణ పనులను ఆయన ప్రారంభించారు. అనంతరం స్థానిక ప్రజల సమస్యలను అడిగి తెలుసుకున్నారు. ఈ సందర్భంగా ఆయన మాట్లాడుతూ నియోజకవర్గ పరిధిలోని ప్రజలు ఎదుర్కొంటున్న సమస్యల పరిష్కారానికి నిరంతరం కృషి చేస్తున్నట్లు చెప్పారు. బస్తీ లు, కాలనీలు అనే తేడా లేకుండా రోడ్లు, డ్రైనేజీ వంటి మౌలిక సౌకర్యాలను కల్పిస్తూ ప్రజలు ఎదుర్కొంటున్న ఇబ్బందులను పరిష్కరిస్తున్నట్లు వివరించారు. వికార్ నగర్ లోని డ్రైనేజీ సమస్యకు కూడా త్వరలోనే శాశ్వత పరిష్కారం చూపనున్నట్లు చెప్పారు. సమస్య పరిష్కారం కోసం తీసుకోవాల్సిన చర్యలపై ఇప్పటికే ప్రతిపాదనలు సిద్ధం చేసినట్లు చెప్పారు. వీలైనంత త్వరగా నిధులు మంజూరు చేయించి పనులు చేపట్టడం జరుగుతుందని అన్నారు. డ్రైనేజీ నిర్మాణ పనులు చేసిన అనంతరం రోడ్ల నిర్మాణం చేపట్టనున్నట్లు తెలిపారు. కార్యక్రమంలో మాజీ కార్పొరేటర్ టి. మహేశ్వరి, జిహెచ్ఎంసి డి ఈ మహేష్, వాటర్ వర్క్స్ డి జి ఎం ఆశిష్, శానిటేషన్ డి ఈ వెంకటేశం, హార్టికల్చర్ అధికారి రోహిత్, డివిజన్ బిఆర్ఎస్ పార్టీ అధ్యక్షుడు శ్రీనివాస్ గౌడ్, నాయకులు టి.శ్రీహరి, నరేందర్, శేఖర్, అఖిల్, నాగరాజు గౌడ్, జావీద్, బంటి, గిరి, ఎల్ల స్వామి, నసీమా బేగం, శారద తదితరులు ఉన్నారు.