మణిపూర్‌లో మిలిటెంట్ల కాల్పుల కలకలం.. నలుగురు మృతి
ఇంఫాల్: మణిపూర్‌లో మరోసారి మిలిటెంట్ల కాల్పులు కలకలం సృష్టించాయి. ఉఖ్రుల్ జిల్లాలోని టీఎం కసోమ్ ప్రాంతంలో ఇంఫాల్-ఉఖ్రుల్ ప్రధాన రహదారిపై ప్రయాణిస్తున్న రెండు వాహనాలను లక్ష్యంగా చేసుకుని అనుమానిత మిలిటెంట్లు మెరుపు దాడికి పాల్పడ్డారు. సాయుధులైన దుండగులు ఒక్కసారిగా వాహనాలపై విచక్షణారహితంగా కాల్పులు జరపడంతో ఈ ఘటనలో నలుగురు వ్యక్తులు అక్కడికక్కడే ప్రాణాలు కోల్పోయారు.
ఈ దారుణ ఘటనతో ఇంఫాల్-ఉఖ్రుల్ రహదారిపై తీవ్ర ఉద్రిక్త పరిస్థితులు నెలకొన్నాయి. సమాచారం అందుకున్న వెంటనే భద్రతా బలగాలు, స్థానిక పోలీసులు భారీగా ఘటనాస్థలానికి చేరుకుని పరిస్థితిని సమీక్షించారు. దాడికి పాల్పడి సమీప అటవీ ప్రాంతాల్లోకి పారిపోయిన మిలిటెంట్లను పట్టుకునేందుకు భద్రతా దళాలు ఆ ప్రాంతాన్ని చుట్టుముట్టి ముమ్మరంగా కూంబింగ్ ఆపరేషన్ నిర్వహిస్తున్నాయి. ఈ ఘటనపై పోలీసులు కేసు నమోదు చేసి దర్యాప్తు చేపట్టారు.
