'రణబాలి' సెట్స్‌లో దారుణమైన సీన్.. కంటతడి పెట్టుకోబోయిన బ్రిటిష్ నటుడు బెనెడిక్ట్ గారెట్!
సూర్య ఎంటర్‌టైన్‌మెంట్ డెస్క్: విజయ్ దేవరకొండ, రష్మిక మందన్న జంటగా రాహుల్ సాంకృత్యాన్ దర్శకత్వంలో తెరకెక్కుతున్న ప్రతిష్టాత్మక పీరియాడిక్ యాక్షన్ మూవీ 'రణబాలి'. అక్టోబర్ 16న ప్రపంచవ్యాప్తంగా గ్రాండ్‌గా విడుదల కానున్న ఈ చిత్రంలో బ్రిటిష్ అధికారిగా ప్రతికూల పాత్ర పోషించిన హాలీవుడ్ నటుడు బెనెడిక్ట్ గారెట్ తన షూటింగ్ అనుభవాలను పంచుకున్నారు. ఈ సినిమాలో బ్రిటీష్ కాలం నాటి క్రూరమైన అధికారిగా నటించడం తనకు ఎంతో ఛాలెంజింగ్‌గా అనిపించిందని, కొన్ని దారుణమైన సన్నివేశాల్లో నటిస్తున్నప్పుడు భావోద్వేగానికి గురై దాదాపు కంటతడి పెట్టుకున్నానని ఆయన వెల్లడించారు.
పందొమ్మిదో శతాబ్దంలో భారతదేశంలో బ్రిటిష్ పాలన కారణంగా సంభవించిన ఘోర కరువు, నాటి రాయలసీమ ప్రాంత ప్రజలు ఎదుర్కొన్న తీవ్రమైన అన్యాయాల నేపథ్యంలో ఈ సినిమా కథ సాగుతుంది. బ్రిటీషర్లు భారతదేశం నుంచి ధాన్యాన్ని ఇతర ప్రాంతాలకు తరలించడం వల్ల స్థానికులు ఆకలితో అలమటించిన చారిత్రక నిజాలను ఈ సినిమాలో సహజంగా చూపించారని బెనెడిక్ట్ తెలిపారు. పాఠశాలల్లో నేర్పించని భారతదేశ నిజమైన చరిత్రను, నాటి బ్రిటిష్ పాలకుల క్రూరత్వాన్ని ప్రతిబింబించేలా ఈ చిత్రాన్ని రూపుదిద్దారని ఆయన పేర్కొన్నారు.
ఇక టాలీవుడ్‌లో పనిచేయడంపై మాట్లాడిన బెనెడిక్ట్ గారెట్, గతంలో పవన్ కళ్యాణ్ చిత్రంతో తెలుగులోకి అడుగుపెట్టినప్పుడు భాష రాక కొంత ఇబ్బంది పడినప్పటికీ, ఈ చిత్రంలో తన సంభాషణలన్నీ ఇంగ్లీష్‌లోనే ఉండటం వల్ల ఎంతో సులువుగా నటించగలిగానని చెప్పారు. విజయ్ దేవరకొండ, రష్మిక మందన్నలతో కలసి పనిచేయడం గొప్ప అనుభవమని, సెట్స్‌లో నటులను ప్రశాంతంగా ఉంచుతూ డైరెక్టర్ రాహుల్ సాంకృత్యాన్ పని చేయించుకున్న తీరు అద్భుతమని కొనియాడారు.
తెలుగు సినీ పరిశ్రమ నిర్మాణ విలువలు, కథా కథనాలు అంతర్జాతీయ స్థాయికి చేరుకున్నాయని బెనెడిక్ట్ ప్రశంసించారు. అక్టోబర్ 16న థియేటర్లలోకి రాబోతున్న ఈ పీరియాడిక్ డ్రామా ప్రేక్షకులకు సరికొత్త అనుభూతిని అందించడమే కాకుండా బాక్సాఫీస్ వద్ద ఘన విజయాన్ని సాధిస్తుందని ఆయన ధీమా వ్యక్తం చేశారు. విజయ్ దేవరకొండ, రష్మిక కాంబినేషన్‌లో వస్తున్న ఈ సినిమాపై ప్రస్తుతం సినీ వర్గాల్లో భారీ అంచనాలు నెలకొన్నాయి.
Also Read: హాలీవుడ్‌లో విషాదం.. ప్రముఖ 'బ్రేకింగ్ బ్యాడ్' నటుడు ఆర్జే మిట్టే మృతి!
