ఘనంగా ఓ నా సిద్ధయ్య సాంగ్ టైటిల్ పోస్టర్ లాంచ్ - ఆటో డ్రైవర్లకు ఇన్సూరెన్స్ అందజేసిన సిద్ధు రెడ్డి

సూర్య తెలంగాణ డెస్క్: సామాజిక సేవా కార్యక్రమాలతో పాటు విభిన్న కళాత్మక ప్రయత్నాలతో ముందుకు వెళ్తున్న సిద్ధు రెడ్డి ప్రధాన పాత్రలో నటిస్తున్న తాజా ప్రత్యేక గీతం ఓ నా సిద్ధయ్య. ఈ పాటకు సంబంధించిన టైటిల్ పోస్టర్ లాంచ్ ఈవెంట్ నగరంలో అత్యంత వైభవంగా జరిగింది. ఈ కార్యక్రమంలో ఆస్కార్ అవార్డ్ గ్రహీత చంద్రబోస్, ప్రముఖ గీత రచయిత కాసర్ల శ్యాం, ఎమ్మెల్యే ప్రకాష్ గౌడ్, నల్గొండ గద్దర్, గీతా భాస్కర్ తదితర ప్రముఖులు ముఖ్య అతిధులుగా విచ్చేశారు. ఈ సందర్భంగా రామ్ అద్నాన్ దర్శకత్వంలో తెరకెక్కిన ఈ పాట పోస్టర్‌ను ఆవిష్కరించి చిత్ర యూనిట్‌కు శుభాకాంక్షలు తెలిపారు.

ఈ వేడుక సందర్భంగా సామాజిక స్పృహ చాటుతూ సిద్ధు రెడ్డి సుమారు 300 మంది ఆటో డ్రైవర్లకు ఉచిత ఇన్సూరెన్స్ పత్రాలను అందజేసి అందరి ప్రశంసలు అందుకున్నారు. పేదరికంలో ఉన్న వారికి మరియు అత్యవసర సమయాల్లో వైద్య సహాయం కోరిన వారికి తాను ఎప్పుడూ ముందుంటానని ఆయన నిరూపించారు. ఈ కార్యక్రమంలో మాట్లాడిన అతిధులు సిద్ధు రెడ్డి చేస్తున్న సేవా కార్యక్రమాలను కొనియడమే కాకుండా, ఆయన రియల్ లైఫ్ రియల్ హీరో అని ప్రశంసించారు. ఒక మంచి సామాజిక సందేశంతో పాటు కుటుంబ భావోద్వేగాల కలయికగా ఈ పాట రూపుదిద్దుకున్నట్లు చిత్ర బృందం వెల్లడించింది.

రామ్ అద్నాన్ రచన మరియు దర్శకత్వంలో వస్తున్న ఈ పాటను కళ్యాణ్ కీస్ సంగీత సారథ్యంలో రామ్ అద్నాన్, శ్రీనిధి ఆలపించారు. ఈ గీతం కేవలం ఒక సాధారణ పాటలా కాకుండా ఒక గొప్ప సినిమా చూసిన అనుభూతిని ఇస్తుందని, భార్యాభర్తల బంధాన్ని, జీవిత పోరాటాన్ని ప్రతిబింబించేలా ఈ చిత్రం ఉంటుందని మేకర్స్ తెలిపారు. త్వరలోనే ఈ పాట అధికారికంగా విడుదల కానుండగా, ప్రేక్షకుల నుంచి అద్భుతమైన స్పందన లభిస్తుందని చిత్ర యూనిట్ ధీమా వ్యక్తం చేస్తోంది.