కృతి సనన్ ఘాటు కౌంటర్.. ‘సంస్కృతి గుండెల్లో ఉంటుంది.. దుస్తుల్లో కాదు’
రక్షాబంధన్ సందర్భంగా ప్రముఖ ఆభరణాల సంస్థ GIVA రూపొందించిన ప్రకటనలో నటి కృతి సనన్ ధరించిన దుస్తులు సోషల్ మీడియాలో చర్చనీయాంశంగా మారాయి. సంప్రదాయ పండగకు సంబంధించిన ప్రకటనలో ఆధునిక దుస్తులు ధరించడంపై కొందరు నెటిజన్లు అభ్యంతరం వ్యక్తం చేశారు.
ఈ విమర్శలపై కృతి సనన్ స్పందిస్తూ.. పండగల అసలు స్ఫూర్తిని దుస్తులతో ముడిపెట్టడం సరికాదని పేర్కొంది. రక్షాబంధన్ అనేది సోదరసోదరీమణుల మధ్య ప్రేమ, రక్షణ, ఆప్యాయతకు ప్రతీక అని తెలిపింది. తాను, తన సోదరి పరస్పరం రాఖీలు కట్టుకుంటామని.. ఒకరి ఆరోగ్యం, సంతోషం, దీర్ఘాయుష్షు కోసం మరొకరు ప్రార్థించుకుంటామని వెల్లడించింది.
మహిళలు ధరించే దుస్తులను బట్టి వారి సంస్కృతి, సంప్రదాయాల పట్ల గౌరవాన్ని నిర్ణయించకూడదని కృతి స్పష్టం చేసింది. కాలానుగుణంగా దుస్తుల ఫ్యాషన్లో మార్పులు సహజమేనని పేర్కొంటూ.. ‘సంస్కృతి, సంప్రదాయాలు మహిళ హృదయంలో ఉంటాయి.. ఆమె దుస్తుల నెక్లైన్లో కాదు’ అంటూ ఘాటుగా స్పందించింది.
కృతి వ్యాఖ్యలపై నటి, ఎంపీ కంగనా రనౌత్ కూడా స్పందించింది. మహిళలకు తమకు నచ్చిన దుస్తులు ధరించే స్వేచ్ఛ ఉన్నప్పటికీ.. కొన్ని పరిమితులను పాటించడం అవసరమని ఆమె అభిప్రాయపడింది
