బాక్సాఫీస్ వద్ద సంచలనం సృష్టించిన ‘హనుమాన్ అంశ్’: సినిమా హక్కులపై నిర్మాతల కఠిన హెచ్చరిక!
సూర్య ఎంటర్‌టైన్‌మెంట్ డెస్క్: బాక్సాఫీస్ వద్ద అద్భుతమైన వసూళ్లతో దూసుకుపోతున్న ఆధ్యాత్మిక చిత్రం ‘హనుమాన్ అంశ్’ చుట్టూ తాజాగా వివాదాలు ముసురుకున్నాయి. ప్రసిద్ధ ఆధ్యాత్మిక గురువు నీమ్ కరోలీ బాబా జీవిత చరిత్ర ఆధారంగా తెరకెక్కిన ఈ చిత్రం బాక్సాఫీస్ వద్ద ఏకంగా వందల కోట్ల వసూళ్లను సాధించి సంచలనం సృష్టించింది. అయితే ఈ సినిమా డిజిటల్, థియేట్రికల్ హక్కులు అలాగే వాణిజ్య ఒప్పందాల విషయంలో కొందరు అనధికారికంగా వ్యవహరిస్తున్నారన్న వార్తల నేపథ్యంలో చిత్ర నిర్మాణ సంస్థ స్వయంభు మీడియా నెట్‌వర్క్ తీవ్రంగా స్పందించింది. సినిమా హక్కులపై ఏ ఒక్క వ్యక్తికి కూడా స్వతంత్రంగా నిర్ణయం తీసుకునే అధికారాలు లేవని స్పష్టం చేస్తూ నిర్మాతలు హెచ్చరిక జారీ చేశారు.
ఈ చిత్రానికి సంబంధించి నమ్రతా జి సింగ్, డాక్టర్ విశాల్ చతుర్వేది, రాగిణి సోనా మరియు అనుప్రియ నగర్ అధికారిక నిర్మాతలుగా వ్యవహరిస్తున్నట్లు ప్రొడక్షన్ హౌస్ స్పష్టం చేసింది. సినిమాకు సంబంధించిన థియేట్రికల్, ఓటీటీ, శాటిలైట్, మ్యూజిక్ మరియు గేమింగ్ హక్కులన్నీ నిర్మాతల మధ్య కుదిరిన అధికారిక ఒప్పందాల ద్వారా మాత్రమే అమలవుతాయని తేల్చిచెప్పారు. సినిమా పబ్లిసిటీ, అవార్డు నామినేషన్లు లేదా ఇతర బిజినెస్ భాగస్వామ్యాల విషయంలో ఎవరైనా వ్యక్తిగతంగా వ్యవహరిస్తే వాటిని చట్టపరంగా పరిగణించబోమని హెచ్చరించారు. అనధికారికంగా ఎవరైనా ప్రచారాలు లేదా ఒప్పందాలు కుదుర్చుకుంటే వారిపై కఠిన చర్యలు తీసుకుంటామని స్పష్టం చేశారు.
కేవలం కొద్దిపాటి బడ్జెట్‌తో తెరకెక్కిన ఈ చిత్రం బాక్సాఫీస్ వద్ద ఊహించని రీతిలో సుమారు 342 కోట్ల రూపాయలకు పైగా వసూళ్లను రాబట్టి ట్రేడ్ వర్గాలను సైతం ఆశ్చర్యపరిచింది. ఆధ్యాత్మిక భావాలతో తెరకెక్కిన ఈ చిత్రానికి ప్రపంచవ్యాప్తంగా ఉన్న భక్తుల నుంచి భారీ ఆదరణ లభిస్తోందని, సినిమా మేలిమి అనుభూతిని కాపాడేందుకే తాము ఈ కఠిన నిర్ణయం తీసుకోవాల్సి వచ్చిందని ఎగ్జిక్యూటివ్ డైరెక్టర్లు తెలిపారు. భవిష్యత్తులో సినిమాకు సంబంధించిన ఏవైనా అధికారిక ప్రకటనలు లేదా ఇంటర్వ్యూల కోసం తమను సంప్రదించాలని నటీనటులకు, సాంకేతిక నిపుణులకు సూచించారు.
Also Read: నిధి చుట్టూ దెయ్యం కథ: వెన్నులో వణుకు పుట్టించేలా ఎస్ఆర్ కల్యాణమండపం డైరెక్టర్ ‘కొరివి’ గ్లింప్స్!
