రష్యా యుద్ధంలో గాజువాక యువకుడు.. తల్లి కన్నీటి వేదన

గాజువాక, సూర్య : ఉపాధి కోసం రష్యా వెళ్లిన గాజువాక మండలం దువ్వాడ సమీపంలోని జేఎన్‌ఆర్‌యూఎం కాలనీకి చెందిన జెట్టి వంశీ, ఉక్రెయిన్‌తో జరుగుతున్న భీకర యుద్ధ రంగంలో చిక్కుకుని ప్రాణభయంతో కొట్టుమిట్టాడుతున్నాడు. కుటుంబ భారాన్ని మోసేందుకు వెళ్లిన కొడుకు మోసపోయి, రష్యన్ ఆర్మీ బలవంతపు యుద్ధానికి బలైపోతుండడంతో ఆ తల్లి అప్పలకొండ పడుతున్న ఆవేదన వర్ణనాతీతంగా మారింది. వాస్తవానికి ఫ్రూట్స్ ప్యాకింగ్ పని కోసమని వెళ్లిన వంశీని అక్కడి ఏజెంట్లు నట్టేట ముంచి వదిలేయడంతో, నిస్సహాయ స్థితిలో ఉన్న అతడిని నేపాల్‌కు చెందిన ఓ వ్యక్తి మాయమాటలు చెప్పి ఆర్మీలో చేర్చాడు. తీరా అక్కడికి వెళ్లాక కళ్ల ముందే తోటి స్నేహితుడు కనిపించకుండా పోవడం, బలవంతంగా యుద్ధం చేయిస్తుండటంతో వంశీ తల్లడిల్లిపోయాడు.

"ఇది నా చివరి వీడియో.. ఇండియాకి నేను తిరిగి రాలేను.. యుద్ధానికి వెళ్లనంటే బలవంతంగా వ్యాన్లలో ఎత్తుకెళ్లి పడేస్తున్నారు" అంటూ తన స్నేహితుడు సతీశ్‌తో కలిసి సోషల్ మీడియా ద్వారా తల్లికి పంపిన కంటతడి పెట్టించే వీడియో ఇప్పుడు తీవ్ర కలకలం రేపుతోంది. తమతో పాటు వచ్చిన ఐదుగురిలో ప్రస్తుతం తాను, సతీశ్ మాత్రమే మిగిలామని వంశీ తల్లికి ఫోన్ చేసి వాపోయాడు. భర్త లేక, ఒక ఆడపిల్ల, ఒక బాబుతో జీవనం సాగిస్తున్న తన బాధను అర్థం చేసుకుని ఆదుకోవాలని తల్లి అప్పలకొండ ప్రభుత్వాన్ని వేడుకుంటున్నారు. రష్యా ఆర్మీ బారిన పడిన తన కుమారుడు వంశీని రక్షించి క్షేమంగా ఇండియాకు తీసుకురావాలని ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, మంత్రి నారా లోకేష్‌లను ఆమె కన్నీటి పర్యంతమవుతూ ప్రాధేయపడుతున్నారు. రాష్ట్ర ప్రభుత్వం తక్షణమే స్పందించి వంశీని సురక్షితంగా స్వదేశానికి రప్పించాలని స్థానికులు సైతం కోరుతున్నారు.