అక్షయ్ కుమార్ 'సముక్' మోషన్ పోస్టర్ రిలీజ్.. భయానక జీవితో పోరాటం, రిలీజ్ ఎప్పుడంటే?
సూర్య ఎంటర్టైన్మెంట్ డెస్క్: బాలీవుడ్ నటుడు అక్షయ్ కుమార్ సరికొత్త జానర్తో ప్రేక్షకుల ముందుకు వచ్చేందుకు సిద్ధమవుతున్నారు. 2026లో భూత్ బంగ్లా, వెల్కమ్ టు ది జంగిల్, హైవాన్ చిత్రాలతో అలరించిన ఆయన, తాజాగా సముక్ అనే క్రియేచర్ థ్రిల్లర్ ప్రాజెక్ట్ను ప్రకటించారు. ఈ సినిమా ఫస్ట్ లుక్ మోషన్ పోస్టర్ను చిత్రబృందం విడుదల చేయగా, ఇందులోని చీకటి ప్రపంచం, భయానక ముప్పు ప్రేక్షకుల్లో ఆసక్తిని రేకెత్తిస్తున్నాయి. హై-ఆక్టేన్ యాక్షన్, సైన్స్ ఫిక్షన్, సర్వైవల్ హారర్ అంశాల మేళవింపుతో రూపొందుతున్న ఈ చిత్రం 2027 మే 28న ప్రపంచవ్యాప్తంగా థియేటర్లలో విడుదల కానుంది.
సోషల్ మీడియా వేదికగా మోషన్ పోస్టర్ను పంచుకున్న అక్షయ్ కుమార్, శత్రువు మనిషి కాదని, కానీ పోరాటం మాత్రం మానవాళి కోసమని, వెనక్కి తగ్గే ప్రసక్తే లేదని పేర్కొన్నారు. పొగమంచు కమ్మిన దట్టమైన అడవి నేపథ్యంలో నల్లటి సూట్లో తుపాకీ చేతబట్టి అజ్ఞాత శత్రువును ఎదుర్కొనేందుకు అక్షయ్ సిద్ధమవుతున్న దృశ్యం పోస్టర్లో కనిపిస్తోంది. ఆ తర్వాత కనిపించే భయానక జీవి భారీ దవడలు, పదునైన పళ్లు, నోటి నుంచి కారుతున్న నల్లటి ద్రవంతో ఒళ్లు గగుర్పొడిచేలా ఉంది.
ఈ చిత్రంతో అక్షయ్ కుమార్, నిర్మాత విపుల్ అమృత్లాల్ షా 13 ఏళ్ల తర్వాత మళ్లీ కలిసి పనిచేస్తున్నారు. సన్షైన్ పిక్చర్స్ బ్యానర్పై విపుల్ అమృత్లాల్ షా నిర్మిస్తున్న ఈ సినిమాకు ఆషిన్ ఎ. షా సహ నిర్మాతగా వ్యవహరిస్తున్నారు. కనిష్క్ వర్మ దర్శకత్వం వహిస్తున్నారు. గతంలో ఆంఖేన్, వక్త్, నమస్తే లండన్, సింగ్ ఈజ్ కింగ్ వంటి విజయవంతమైన చిత్రాల తర్వాత వీరిద్దరి కలయికలో వస్తున్న ఈ ప్రాజెక్ట్పై సినీ వర్గాల్లో ప్రత్యేక దృష్టి నెలకొంది.
భారతీయ ప్రధాన సినీ రంగంలో అరుదుగా కనిపించే క్రియేచర్ ఆధారిత కథ కోసం మేకర్స్ అంతర్జాతీయ సాంకేతిక నిపుణులను రంగంలోకి దించారు. ఏలియన్, ప్రిడేటర్ వంటి చిత్రాలకు పనిచేసిన ఆస్కార్ నామినేటెడ్ డిజైనర్ అలెక్ గిల్లిస్ ఆ భయానక జీవిని తీర్చిదిద్దనున్నారు. మిషన్ ఇంపాజిబుల్, వెనమ్ చిత్రాలకు పనిచేసిన బ్రిటిష్ స్టంట్ కోఆర్డినేటర్ ల్యూక్ టంబర్ యాక్షన్ సన్నివేశాలను సమకూర్చనున్నారు. అక్షయ్ కుమార్తో పాటు రుక్మిణీ మైత్రా, వినీత్ కుమార్ సింగ్, రజత్ కపూర్, బనితా సంధు, స్వానంద్ కిర్కిరే కీలక పాత్రల్లో నటిస్తున్న ఈ సినిమా మే 28, 2027న ప్రేక్షకుల ముందుకు రానుంది.
Also Read: ఎట్టకేలకు 'వారణాసి' అప్డేట్.. అసలైన బ్లాస్ట్ ఎప్పుడంటే?