రాజకీయాల్లోకి అజిత్ ఎంట్రీ?.. పార్టీ పేరు, జెండాతో ఫ్యాన్స్ హడావుడి!
సూర్య ఎంటర్టైన్మెంట్ డెస్క్: తమిళ చిత్రసీమలో ఎలాంటి ప్రచారం, హడావిడి లేకుండా బాక్సాఫీస్ వద్ద కేవలం తన క్రేజ్తో వసూళ్ల వర్షం కురిపించే అజిత్ కుమార్ రాజకీయ రంగప్రవేశంపై ప్రస్తుతం కోలీవుడ్లో తీవ్ర చర్చ జరుగుతోంది. సినిమాలలో నటిస్తూనే తన పూర్తి సమయాన్ని కార్ రేసింగ్పై కేటాయిస్తానని ఆయన స్పష్టం చేసినప్పటికీ, ఆయన అభిమానులు మాత్రం మరో ఆలోచనలో ఉన్నట్లు తెలుస్తోంది. అజిత్ను ఎలాగైనా ప్రత్యక్ష రాజకీయాల్లోకి తీసుకురావాలనే ఉద్దేశంతో పలు జిల్లాల అభిమానులు సొంతంగా పార్టీలు ప్రారంభించి, ప్రత్యేకంగా జెండాలను కూడా సిద్ధం చేస్తూ ఆయనను రాజకీయాలకు ఆహ్వానిస్తున్నారు.
తమిళనాడు రాజకీయాల్లో ఇప్పటికే ప్రముఖ హీరోలు అడుగుపెడుతున్న తరుణంలో, అజిత్ అభిమానులు చేస్తున్న ఈ హడావుడి రాష్ట్రవ్యాప్తంగా సంచలనం సృష్టిస్తోంది. ఇటీవల ముఖ్యమంత్రి విజయ్తో అజిత్ భేటీ కావడం, ఆ సమయంలో కార్ల రేసింగ్ మరియు ఇతర ఆసక్తుల గురించి వారు చర్చించుకోవడం సోషల్ మీడియాలో విపరీతంగా ట్రెండ్ అయింది. అయితే అజిత్కు రాజకీయాలపై ఎప్పుడూ ఎలాంటి ఆసక్తి లేదని ఆయన సన్నిహిత వర్గాలు స్పష్టం చేస్తున్నాయి. అయినప్పటికీ అభిమానులు మాత్రం ఆయన పేరుతో రాజకీయ వేదికలను సిద్ధం చేయడం, పార్టీ ఏర్పాట్లపై నిమగ్నం కావడం గమనార్హం.
తనపై అభిమానులు చూపుతున్న ఆప్యాయతను ఎప్పుడూ గౌరవించే అజిత్, ఈ రాజకీయ పరిణామాలపై మాత్రం ఇప్పటివరకు ఎలాంటి అధికారిక ప్రకటన చేయకుండా మౌనం వహించడం గమనార్హం. అభిమానుల ఈ చర్యలపై ఆయన ఏ విధంగా స్పందిస్తారనే దానిపై సర్వత్రా ఉత్కంఠ నెలకొంది. సినిమాలతో పాటు రేసింగ్ను తన ప్రపంచంగా మార్చుకున్న అజిత్, ఫ్యాన్స్ ఒత్తిడికి తలగ్గి రాజకీయాల్లోకి వస్తారా లేదా సినిమాలకే పరిమితం అవుతారా అనేది కాలమే నిర్ణయించాల్సి ఉంది.
