లాస్ ఏంజిల్స్‌లో ఎలక్ట్రిక్ టాక్సీ సేవలను ప్రారంభించిన జీఎస్ఎమ్
సూర్య బిజినెస్ డెస్క్: ఆసియా వ్యాప్తంగా సంచలనం సృష్టిస్తున్న వియత్నాంకు చెందిన ప్రముఖ ఎలక్ట్రిక్ టాక్సీ ఆపరేటర్ గ్రీన్ అండ్ స్మార్ట్ మోబిలిటీ (GSM) అమెరికా మార్కెట్లోకి అధికారికంగా ప్రవేశించింది. వియత్నాం దిగ్గజ ఆటోమొబైల్ తయారీ సంస్థ విన్‌ఫాస్ట్‌కు కీలక భాగస్వామిగా ఉన్న జీఎస్ఎమ్, అమెరికాలోని లాస్ ఏంజిల్స్ నగరంలో తమ ఆల్-ఎలక్ట్రిక్ టాక్సీ సేవలను ప్రారంభించినట్లు ప్రకటించింది. ఈ విస్తరణతో అంతర్జాతీయ రవాణా రంగంలో విన్‌ఫాస్త్ ఇవి (EV) వాహనాల వాడకం మరింత వేగవంతం కానుంది.
పర్యావరణ హితమైన రవాణా వ్యవస్థను విస్తరించాలనే లక్ష్యంతో లాస్ ఏంజిల్స్ నగరంలో ఈ సేవలకు శ్రీకారం చుట్టినట్లు కంపెనీ తెలిపింది. ప్రారంభ దశలో సంస్థకు సొంతమైన విద్యుత్ వాహనాలు మరియు నియమితులైన డ్రైవర్లతో సేవలు అందించనున్నట్లు, భవిష్యత్తులో ఇతర భాగస్వాములను కూడా నెట్‌వర్క్‌లోకి అనుసంధానించనున్నట్లు వెల్లడించింది. రాబోయే రోజుల్లో అమెరికాలోని ఇతర ప్రధాన నగరాలతో పాటు ఐరోపా దేశాలైన స్వీడన్, నెదర్లాండ్స్ మార్కెట్లకు కూడా తమ ఈవి టాక్సీ సేవలను విస్తరించాలని జీఎస్ఎమ్ యోచిస్తోంది.
2028 నాటికి హాంకాంగ్ స్టాక్ ఎక్స్చేంజిలో పబ్లిక్ ఇష్యూ (ఐపీఓ)కు వెళ్లేందుకు సన్నాహాలు చేసుకుంటున్న జీఎస్ఎమ్, ఈ పర్యటన ద్వారా అంతర్జాతీయంగా తమ బ్రాండ్ విలువను మరింత పెంచుకునే దిశగా అడుగులు వేస్తోంది. అమెరికా మార్కెట్లో ప్రవేశించడం వల్ల విన్‌ఫాస్త్ ఎలక్ట్రిక్ వాహనాల విక్రయాలు పుంజుకోవడమే కాకుండా, రైడ్ హేలింగ్ విభాగంలో సరికొత్త పోటీ నెలకొంటుందని పారిశ్రామిక విశ్లేషకులు భావిస్తున్నారు.
