జనాభా లెక్కల్లో ఈ ద్వంద్వ ప్రమాణాలేంటి?

బాపట్ల, మేజర్ న్యూస్ ;అమృత్‌ పథకానికి 1.07 లక్షల జనాభా ప్రాతిపదికగా తీసుకుంటే.. మున్సిపల్‌ వార్డుల పునర్విభజనకు వచ్చేసరికి 84 వేలేలా? ఈ వ్యత్యాసానికి అధికారులు సమాధానం చెప్పాలని మాజీ ఉపసభాపతి కోన రఘుపతి డిమాండ్‌ చేశారు. వార్డుల విభజనలో 84 వేల జనాభాను చూపిస్తే, అమృత్‌ పథకం పరిస్థితి ఏమిటని.. ఆ పథకాన్ని కేంద్ర ప్రభుత్వానికి తిరిగి పంపిస్తారా? అని ప్రశ్నించారు. బుధవారం వైకాపా కార్యాలయంలో నిర్వహించిన విలేకరుల సమావేశంలో ఆయన మాట్లాడుతూ.. 44 వార్డుల ఖరారుకు ప్రాతిపదిక ఏమిటో వెల్లడించాలని నిలదీశారు. సర్వే నంబర్లతో సహా వార్డుల సరిహద్దుల వివరాలను స్పష్టంగా ప్రకటించకుండా ప్రజలను తప్పుదోవ పట్టిస్తున్నారని ఆరోపించారు. విలీన గ్రామాల వివరాలు, వార్డుల మ్యాప్‌లను బహిర్గతం చేసి అభ్యంతరాలకు అవకాశం కల్పించాలని కోరారు. పునర్విభజనలో పారదర్శకత పాటించకపోతే న్యాయస్థానాన్ని ఆశ్రయిస్తానని కోన రఘుపతి హెచ్చరించారు.