విశాఖ ఉక్కులో ముగిసిన విజిలెన్స్ వారోత్సవాలు

గాజువాక, సూర్య :  విశాఖ స్టీల్‌ప్లాంట్‌లో ‘నిజాయితీతోనే అభివృద్ధి’ అనే నినాదంతో నిర్వహించిన విజిలెన్స్ అవగాహన వారోత్సవాలు శనివారం ఘనంగా ముగిశాయి. ఈ సందర్భంగా ఏర్పాటు చేసిన సభలో ఆర్ఐఎన్ఎల్ సీఎండీ మాట్లాడుతూ.. విధులను నిజాయితీగా, పారదర్శకంగా నిర్వర్తించడమే అసలైన విజిలెన్స్ అని పేర్కొన్నారు. నిర్ణయాలు తీసుకోవడానికి విజిలెన్స్ ఎప్పుడూ అడ్డంకి కాదని, పనులు సక్రమంగా జరిగేలా చూడటమే దీని ముఖ్య ఉద్దేశమని స్పష్టం చేశారు. నిజాయితీని ప్రతి ఒక్కరూ నిత్యజీవితంలో భాగం చేసుకోవాలని సీవీఓ సూచించారు. ముఖ్య అతిథి, ఎస్ఎస్‌సీ మాజీ ఛైర్మన్ డాక్టర్ ఎస్.కిశోర్ మాట్లాడుతూ.. ముందస్తు విజిలెన్స్ చర్యలతో పాటు నిజాయితీ గల అధికారుల ప్రయోజనాలను కాపాడటం ఎంతో అవసరమని తెలిపారు. వేడుకల్లో చిన్నారుల వీధి నాటిక ఆహూతులను ఆకట్టుకోగా, వివిధ పోటీల విజేతలకు అతిథులు బహుమతులు ప్రదానం చేశారు. కార్యక్రమంలో డైరెక్టర్లు, సీజీఎంలు, ఉన్నతాధికారులు, ఉద్యోగులు, విద్యార్థులు పాల్గొన్నారు.