మత్తు పదార్థాలకు యువత దూరంగా ఉండాలి

పటాన్‌చెరు;విద్యార్థులు,యువత చెడు వ్యసనాలకు దూరంగా ఉంటూ మంచి అలవాట్లను అలవర్చుకోవాలని పటాన్‌చెరు డాక్టర్ ఏపీజే అబ్దుల్ కలాం ప్రభుత్వ డిగ్రీ కళాశాల ప్రిన్సిపల్ ప్రొఫెసర్ ఎం.ప్రవీణ సూచించారు.కళాశాలలో జాతీయ సేవా పథకం (ఎన్ఎస్ఎస్),నెహ్రూ యువ కేంద్రం ఆధ్వర్యంలో నషాముక్త్ – నైబర్‌హుడ్ యువ పార్లమెంట్,జాతీయ సమైక్యత దినోత్సవ కార్యక్రమాన్ని నిర్వహించారు.వందేమాతర గీతంతో కార్యక్రమాన్ని ప్రారంభించి,సర్దార్ వల్లభాయ్ పటేల్ చిత్రపటానికి పూలమాలలు వేసి నివాళులర్పించారు. ఈ సందర్భంగా విద్యార్థులకు నషాముక్త్ భారత్ అంశంపై నినాదాల రచన పోటీలు నిర్వహించారు.ప్రిన్సిపల్ ప్రొఫెసర్ ఎం.ప్రవీణ మాట్లాడుతూ యువత సోషల్ మీడియా, మత్తు పదార్థాల ప్రభావానికి లోనుకాకుండా జీవిత లక్ష్య సాధన దిశగా నిరంతరం కృషి చేయాలని సూచించారు.ముఖ్య అతిథిగా హాజరైన డాక్టర్ నేత్రావతి మాట్లాడుతూ మత్తు పదార్థాలకు అలవాటు పడితే శారీరకంగానే కాకుండా మానసికంగానూ బలహీనపడతారని, తద్వారా జీవితం అస్తవ్యస్తమవుతుందని తెలిపారు.అనంతరం నషాముక్త్ అభియాన్, జాతీయ సమైక్యత ప్రతిజ్ఞలను చేయించారు. పోటీల్లో పాల్గొన్న విద్యార్థులకు మెమెంటోలు అందించి అభినందించారు. జాతీయగీతంతో కార్యక్రమం ముగిసింది.కార్యక్రమంలో ఎన్ఎస్ఎస్ ప్రోగ్రాం అధికారులు ప్రొఫెసర్ ఆకుల వెంకటేశం,డాక్టర్ కరుణ కుమారి,డాక్టర్ పూనమ్ కుమారి,అధ్యాపకులు సునీత, స్రవంతి,డాక్టర్ శివదీప్తి,డాక్టర్ పి. సుజాత,షరీఫ్ మియా, డాక్టర్ మంజుశ్రీ, విద్యార్థులు పాల్గొన్నారు.