విధి నిర్వహణలో నిర్లక్ష్యం వహిస్తే చర్యలు -ఎమ్మెల్యే కోటంరెడ్డి శ్రీధర్ రెడ్డి

నెల్లూరు, కార్పొరేషన్, మేజర్ న్యూస్   :   ప్రజలకు ఇబ్బంది కలిగే విధంగా విధి నిర్వహణలో నిర్లక్ష్యం వహిస్తే చర్యలు తప్పవని నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి ఇంజనీరింగ్ అధికారులకు సూచించారు. శనివారం ఆయన నగరంలోని నెల్లూరు రూరల్  ఎమ్మెల్యే కార్యాలయంలో నగరపాలక సంస్థ ఇంజనీరింగ్ అధికారులతో వివిధ పనులపై సమీక్షించారు.  నెల్లూరు రూరల్ నియోజకవర్గ పరిధిలో ప్రజల సౌకర్యార్థం ఇటీవల కోట్లాది రూపాయలతో సిమెంట్ రోడ్లు, తారు రోడ్ల నిర్మాణ పనులు చేపట్టడం జరిగింది. అయితే రోడ్ల నిర్మాణం పూర్తయిన కొద్ది రోజులకే అండర్‌గ్రౌండ్ డ్రైనేజీ, గ్యాస్ పైప్‌లైన్ తదితర పనుల పేరుతో కొత్తగా నిర్మించిన రోడ్లను తవ్వడం పట్ల అసంతృప్తిని వ్యక్తం చేశారు.  పనులు పూర్తయిన అనంతరం తిరిగి రోడ్లను యథాస్థితికి తీసుకురాకుండా వదిలేయడం పట్ల నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి  తీవ్ర అసంతృప్తి వ్యక్తం చేశారు. ఈ అంశంపై సంబంధిత కార్పొరేషన్ అధికారులతో సమావేశం నిర్వహించి, ఇప్పటికే నిర్మించిన రోడ్లను తవ్వే పనులను తక్షణమే నిలిపివేయాలని సూచించారు. భవిష్యత్తులో చేపట్టాల్సిన అండర్‌గ్రౌండ్ డ్రైనేజీ, గ్యాస్ పైప్‌లైన్ తదితర పనులన్నింటినీ ముందస్తు ప్రణాళికతో సమన్వయం చేసుకోవాలని,  ప్రజాధనం వృథా కాకుండా చూడటంతో పాటు, ప్రజలకు పదేపదే ఇబ్బందులు కలగకుండా అన్ని శాఖల అధికారులు సమన్వయంతో పనిచేయాలని ఎమ్మెల్యే కోటంరెడ్డి శ్రీధర్ రెడ్డి  అధికారులకు సూచించారు.  ప్రజాధనం వృథా కాకూడదని, ప్రజలకు ఇబ్బందులు కలగకూడదన్నారు. ఈ సమావేశంలో నగరపాలక సంస్థ ఈఈలు శేషగిరి రావు, అనిల్ కుమార్, డీఈ శ్రీకాంత్, ఏఈలు అంకలింగం, వంశీకృష్ణ, చంద్రహాస్, చైతన్య, సురేష్, తదితరులు పాల్గొన్నారు.