వీఎస్‌యూ డీన్ అకడమిక్ అఫైర్స్‌గా ఆచార్య అందే ప్రసాద్ నియామకం
వెంకటాచలం, మేజర్ న్యూస్ : విక్రమ సింహపురి విశ్వవిద్యాలయం (వీఎస్‌యూ) డీన్ అకడమిక్ అఫైర్స్‌గా కంప్యూటర్ సైన్స్ విభాగానికి చెందిన ఆచార్య అందే ప్రసాద్ నియమితులయ్యారు. నవంబర్ 4న ఉపకులపతి ఆచార్య అల్లం శ్రీనివాసరావు నియామక ఉత్తర్వులు అందజేయగా, ఆయన బాధ్యతలు స్వీకరించారు.ఆచార్య అందే ప్రసాద్ గతంలో వీఎస్‌యూ కళాశాల ప్రిన్సిపల్, రిజిస్ట్రార్, డీన్ ఫ్యాకల్టీ ఆఫ్ సైన్సెస్‌, ఐక్యూఏసీ డైరెక్టర్‌, కంప్యూటర్ సైన్స్ విభాగాధిపతిగా కీలక బాధ్యతలు నిర్వహించారు. ఐక్యూఏసీ డైరెక్టర్‌గా ఉన్న సమయంలో విశ్వవిద్యాలయానికి ఎన్ ఎ ఎ సి నుంచి 3.23 సి జి పి ఏ తో ఏ గ్రేడ్ సాధించడంలో కీలక పాత్ర పోషించారు. అలాగే ఎన్ ఎస్ ఎస్ జాతీయ పురస్కారాన్ని అందుకున్నారు.ఈ సందర్భంగా ఉపకులపతి అల్లం శ్రీనివాసరావు మాట్లాడుతూ, ఆచార్య అందే ప్రసాద్ అనుభవంతో విశ్వవిద్యాలయంలో విద్యా ప్రమాణాలు, పరిశోధనా రంగాల అభివృద్ధికి మరింత కృషి చేస్తారని ఆకాంక్షించారు. రిజిస్ట్రార్ ఆచార్య కె. సునీత, కళాశాల ప్రిన్సిపల్ ఆచార్య టి. వీరారెడ్డితో పాటు పలువురు అధ్యాపకులు ఆయనకు శుభాకాంక్షలు తెలిపారు.
