హెబ్రోన్‌లో పైకప్పులపై సెటిలర్ల డేరా: పాలస్తీనియన్ల నిరసన
సూర్య ఇంటర్నేషనల్ డెస్క్: ఆక్రమిత వెస్ట్ బ్యాంక్‌లోని చారిత్రక నగరమైన హెబ్రోన్ (అల్-ఖలీల్)లో ఇజ్రాయెలీ సెటిలర్ల విస్తరణ సరికొత్త వివాదానికి తెరలేపింది. నగరంలోని ఓల్డ్ సిటీ పరిధిలో ఉన్న పాలస్తీనియన్ వాణిజ్య భవనాలు, దుకాణాల పైకప్పులపై (రూఫ్‌టాప్స్) ఇజ్రాయెల్ సెటిలర్లు మొబైల్ కంటైనర్లు, తాత్కాలిక నివాస నిర్మాణాలను ఏర్పాటు చేస్తూ కొత్త అవుట్‌పోస్టులను సృష్టిస్తున్నారు. తరతరాలుగా కొనసాగుతున్న తమ చారిత్రక, సాంస్కృతిక వారసత్వాన్ని తుడిచిపెట్టి, నగర పాలస్తీనా అస్తిత్వాన్ని పూర్తిగా మార్చేసేందుకే ఈ తరహా ఆక్రమణలకు పాల్పడుతున్నారని స్థానిక పౌరులు, వ్యాపారులు తీవ్ర ఆందోళన వ్యక్తం చేస్తున్నారు.
భవనాల కింది అంతస్తుల్లో పాలస్తీనా వ్యాపారులు దుకాణాలు నిర్వహిస్తుండగా, పైకప్పులపైకి చేరుకున్న సెటిలర్లు స్థావరాలను నిర్మించుకోవడం వల్ల తీవ్ర ఉద్రిక్తతలు చోటుచేసుకుంటున్నాయి. సెటిలర్లు, భద్రతా దళాల నుంచి వస్తున్న నిరంతర వేధింపులు, ఆంక్షల వల్ల ఏ క్షణంలో తమ దుకాణాలు మూతపడతాయో, ఉపాధి కోల్పోతామోనని వర్తకులు భయాందోళనలు చెందుతున్నారు. భయానక వాతావరణం నెలకొన్నప్పటికీ, తమ పూర్వీకుల నుంచి వారసత్వంగా వచ్చిన దుకాణాలను, చరిత్రను కాపాడుకునేందుకు అక్కడే కొనసాగుతామని స్థానిక బాధితులు స్పష్టం చేస్తున్నారు.
అంతర్జాతీయ చట్టాలకు విరుద్ధంగా సాగుతున్న ఈ ఆక్రమణలు హెబ్రోన్ చారిత్రక స్వరూపాన్ని తీవ్రంగా దెబ్బతీస్తున్నాయని మానవ హక్కుల సంఘాలు, స్థానిక కార్యకర్తలు హెచ్చరిస్తున్నారు. నివాస ప్రాంతాలను బలవంతంగా విభజించి, మూలవాసులను ఖాళీ చేయించే వ్యూహాత్మక చర్యలను తక్షణమే నిలువరించాలని డిమాండ్ చేస్తున్నారు.
