సోషల్ మీడియా నిషేధాన్ని సమర్థించుకున్న ఆస్ట్రేలియా

సూర్య ఇంటర్నేషనల్ డెస్క్: పదహారేళ్ల లోపు వయసున్న పిల్లలు సోషల్ మీడియా ఖాతాలు తెరవకుండా నిషేధిస్తూ తెచ్చిన చట్టాన్ని ఆస్ట్రేలియా ప్రభుత్వం అత్యున్నత న్యాయస్థానంలో (హైకోర్టు) సమర్థించుకుంది. ఎదుగుతున్న పిల్లల మెదడు వికాసం, మానసిక ఆరోగ్యాన్ని రక్షించడానికే ఈ కఠిన నిబంధనలు అనివార్యమని ప్రభుత్వ తరఫు న్యాయవాదులు వాదించారు. ప్రముఖ ఆన్‌లైన్ ఫోరమ్ 'రెడ్డిట్' (Reddit) మరియు 'డిజిటల్ ఫ్రీడమ్ ప్రాజెక్ట్' దాఖలు చేసిన రాజ్యాంగ సవాలు పిటిషన్లపై ఏడుగురు న్యాయమూర్తుల ధర్మాసనం ఎదుట విచారణ సందర్భంగా ప్రభుత్వం తన వాదనలను వినిపించింది.

సోషల్ మీడియా ప్లాట్‌ఫారమ్‌ల వల్ల చిన్నారుల్లో వ్యసన ధోరణులు, నిద్రలేమి, తీవ్ర కుంగుబాటు (డిప్రెషన్), ఆందోళన మరియు ఏకాగ్రత లోపాలు (ADHD) వంటి పెను ముప్పులు పొంచి ఉన్నాయని ప్రభుత్వ న్యాయవాదులు కోర్టు దృష్టికి తీసుకెళ్లారు. ఈ చట్టం రాజ్యాంగం కల్పించిన రాజకీయ భావవ్యక్తీకరణ స్వేచ్ఛను హరిస్తోందన్న పిటిషనర్ల వాదనను ప్రభుత్వం తోసిపుచ్చింది. ఖాతా లేకుండా కూడా పిల్లలు పబ్లిక్ కంటెంట్‌ను వీక్షించవచ్చని, ఈ నిబంధనలు కేవలం ప్లాట్‌ఫారమ్‌ల నియంత్రణకు మాత్రమే ఉద్దేశించినవని స్పష్టం చేసింది.

ఫేస్‌బుక్, ఇన్‌స్టాగ్రామ్, టిక్‌టాక్, ఎక్స్, యూట్యూబ్, రెడ్డిట్ సహా ప్రముఖ ప్లాట్‌ఫారమ్‌లు 16 ఏళ్లలోపు వినియోగదారులను నిరోధించేందుకు తగిన చర్యలు తీసుకోకపోతే భారీ జరిమానాలు ఎదుర్కోవాల్సి ఉంటుందని చట్టం నిర్దేశిస్తోంది. అయితే పిల్లలపై లేదా తల్లిదండ్రులపై ఎటువంటి శిక్షలు ఉండవని తెలిపింది. అంతర్జాతీయంగా పలు దేశాలు సైతం పిల్లల డిజిటల్ భద్రతపై ఆందోళన వ్యక్తం చేస్తున్న తరుణంలో, ఆస్ట్రేలియా హైకోర్టు వెలువరించే తీర్పు ప్రపంచవ్యాప్తంగా ప్రభావం చూపే అవకాశం ఉంది.