జడ్పిటిసి, ఎంపీటీసీ ఎన్నికలకు సర్వం సిద్ధం

పాచిపెంట, సూర్య : నేడు జరగబోవు జడ్పిటిసి, ఎంపీటీసీ  ఎన్నికలకు సంబంధించి ఎన్నికల నిర్వహణకు అన్నీ  సిద్ధం చేసినట్లు ఎన్నికల రిటర్నింగ్ అధికారి వి రాధాకృష్ణ విలేకరులకు తెలిపారు. మండలంలో 46 పోలింగ్ కేంద్రాలు, 304 ఎన్నికల సిబ్బందితో నిర్వహించడం జరుగుతుందని తెలిపారు. ఈ ఎన్నికలకు 4 జోన్లగా విభజించి ఏడు రూట్లలో 50 మంది పోలీసులుతో పటిష్టమైన భద్రత ఏర్పాట్లు చేస్తూ, ఒక పోలీసు ఫ్లయింగ్ స్క్వాడ్ తో  ఎన్నికల పర్యవేక్షణను కొనసాగించేందుకు తగిన ఏర్పాట్లు చేయడం జరిగిందని ఆయన తెలిపారు. అలాగే మండలంలో అతి సమస్సాత్మకమైన గ్రామాలలో ఎటువంటి అవాంఛనీయ సంఘటనలు జరగనీయకుండా ఉండేందుకు తగిన పోలీసు బందోబస్తు ఏర్పాటు చేయడం జరిగిందని రిటర్నింగ్ అధికారి రాధాకృష్ణ చెప్పారు. అంతేకాకుండా ఇటీవల కురిసిన అర్నాబ్ తుఫాను కారణంగా ఏజెన్సీ ప్రాంతాల రోడ్లు ఎక్కువగా దెబ్బతిన్నాయి. ఆయా ప్రాంతాలలో ఎన్నికలు నిర్వహించడం ఆనందాన్ని ఇచ్చినప్పటికీ సమస్యలు మాత్రం ఎన్నికల సిబ్బందిని కాస్తా ఇబ్బందికి గురి చేసే పరిస్థితులు ఉన్నాయి. ప్రశాంతంగా ఎన్నికలు జరిపేందుకు అందరూ కృషి చేయాలని ఎన్నికల అధికారి రాధాకృష్ణ, ఎం పి డి ఓ బి వి జె పాత్రో కోరారు.